ថៃ ប្រុងប្រយ័ត្នខ្ពស់ ចំពោះមេរោគ អេបូឡា (មានវីដេអូ) 

ក្រសួង​សុខាភិបាល​សាធារណៈថៃ ​កំពុង​បង្កើន​ការ​ពិនិត្យ​សុខភាព ​លើ​អ្នក​ធ្វើ​ដំណើរ​មក​ពី​ទ្វីប​អាហ្រ្វិក ​ដើម្បី​ការពារ​ការ​រីក​រាល​ដាល​នៃ​មេរោគ អេបូឡា នៅក្នុង​ប្រទេស។

ចំណាត់ការនេះបានកើតឡើង ថ្វីបើអង្គការសុខភាពពិភពលោក (WHO) មិនទាន់ចាត់ថ្នាក់ការផ្ទុះឡើងនៃមេរោគ អេបូឡា នៅក្នុងទ្វីបអាហ្រ្វិក ថា ជាគ្រាអាសន្នសុខភាពសាធារណៈអន្តរជាតិក៏ដោយ។

អ្នកនាំពាក្យរាជរដ្ឋាភិបាល លោកស្រី Traisuree Taisaranakul បាននិយាយថា រដ្ឋាភិបាលដឹងពីការផ្ទុះឡើងនៃវីរុស អេបូឡា ប្រភេទស៊ូដង់ ដែលត្រូវបានរកឃើញជាលើកដំបូងនៅក្នុងប្រទេសអ៊ូហ្គង់ដា កាលពីខែមុន។

ឧបនាយករដ្ឋមន្ត្រី និងជារដ្ឋមន្ត្រីក្រសួងសុខាភិបាលសាធារណៈ លោក Anutin Charnvirakul បានណែនាំដល់ស្ថាប័នពាក់ព័ន្ធទាំងអស់ ត្រូវបង្កើនការឃ្លាំមើលលើអ្នកដំណើរដែលចូលមក ជាពិសេសអ្នកដែលមកតាមជើងហោះហើរពីទ្វីបអាហ្វ្រិក។

អ្នកដំណើរទាំងអស់ដែលមកពីទ្វីបអាហ្រ្វិក ជាពិសេសអ្នកដែលបានចាប់ផ្តើមដំណើរក្នុងប្រទេសអ៊ូហ្គង់ដា នឹងត្រូវបំពេញបែបបទនៅច្រកត្រួតពិនិត្យជំងឺឆ្លងអន្តរជាតិ នៅពេលមកដល់អាកាសយានដ្ឋានអន្តរជាតិរបស់ប្រទេសថៃ មុនពេលពួកគេអាចបន្តទៅកាន់បញ្ជរអន្តោប្រវេសន៍បាន។

គួរបញ្ជាក់ថា គិតត្រឹមថ្ងៃចន្ទទី២៤ខែតុលា មានករណីជំងឺអេបូឡាដែលត្រូវបានបញ្ជាក់ចំនួន ៩០ ករណី ក្នុងនោះមានមន្ត្រីសុខាភិបាលសាធារណៈចំនួន ១១ ករណីនៅប្រទេសអ៊ូហ្គង់ដា។ រហូតមកដល់ពេលនេះ មនុស្សចំនួន២២នាក់ឬប្រហែល ៤៩% បានស្លាប់។

វីរុសអេបូឡាពូជស៊ូដង់នេះ ត្រូវបានគេដឹងថាមានអត្រាស្លាប់ប្រហែល ៥៣% តែគឺមិនសាហាវដូចពូជ Zaire ដែលមានអត្រាស្លាប់ ៦៨%នោះទេ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖​ Bangkok Post

ចុចអាន៖ អ៊ូហ្គង់ដា ប្រាប់ឲ្យប្រជាជនប្រយ័ត្ន ខណៈរកឃើញអ្នកឆ្លងជំងឺអេបូឡា ៩ករណីទៀត