តៃវ៉ាន់ ​ជំរុញ​ឲ្យ ​ចិន​ បញ្ឈប់ការសម្ញែងកម្លាំងយោធា (មានវីដេអូ)

ប្រធានក្រុមប្រឹក្សាកិច្ចការចិនដីគោករបស់កោះតៃវ៉ាន់ បាននិយាយនៅថ្ងៃសុក្រទី២៨ខែតុលានេះថា ប្រទេសចិន គួរតែបញ្ឈប់ការសម្ញែងកម្លាំងយោធារបស់ខ្លួនដាក់កោះតៃវ៉ាន់ ហើយគួររក្សាសន្តិភាព និងស្ថិរភាព។

ប្រទេសចិន បានបង្កើនសកម្មភាពយោធានៅជិតតៃវ៉ាន់ ចាប់តាំងពីខែសីហាមក នៅពេលខ្លួនធ្វើសមយុទ្ធព័ទ្ធជុំវិញកោះនេះ បន្ទាប់ពីដំណើរទស្សនកិច្ចទៅកាន់ទីក្រុងតៃប៉ិដោយប្រធានសភាអាមេរិក លោកស្រី Nancy Pelosi។

រដ្ឋមន្ត្រីក្រុមប្រឹក្សាកិច្ចការដីគោក លោក Chiu Tai-san បានប្រាប់វេទិកាមួយក្នុងទីក្រុងតៃប៉ិ ថា “ទីក្រុងប៉េកាំងគួរតែបញ្ឈប់ការសម្ញែងកម្លាំងយោធារបស់ខ្លួន ព្រោះវាមានតែធ្វើឲ្យគម្លាតរវាងភាគីទាំងពីរកាន់តែឆ្ងាយ និងបង្កើនភាពតានតឹងនៅក្នុងតំបន់ប៉ុណ្ណោះ”។

លោក Chiu និយាយថា “យើងសូមជំរុញឲ្យចិនដីគោក ទម្លាក់អាវុធចុះ ហើយងាកមករក្សាសន្តិភាព និងស្ថិរភាពវិញ។ គន្លឹះនៃសន្តិភាព គឺត្រូវបង្វែរផ្នត់គំនិតនៃការដោះស្រាយបញ្ហាដោយប្រើកម្លាំង។ ទីក្រុងប៉េកាំង គួរតែដោះស្រាយការខ្វែងគំនិតជាមួយតៃប៉ិ តាមរយៈកិច្ចសន្ទនាស្ថាបនាដោយគ្មានលក្ខខណ្ឌជាមុន”។

ចិន ចាត់ទុកកោះតៃវ៉ាន់ជាទឹកដីរបស់ខ្លួន។ កាលពីដើមខែនេះ លោកប្រធានាធិបតី ស៊ី ជីនពីង បាននិយាយក្នុងសុន្ទរកថាមួយ នៅឯពិធីបើកសមាជបក្សកុម្មុយនិស្តក្នុងទីក្រុងប៉េកាំងថា វាអាស្រ័យលើប្រជាជនចិន ក្នុងការដោះស្រាយបញ្ហាតៃវ៉ាន់ ហើយថា ប្រទេសចិននឹងមិនបោះបង់ការប្រើប្រាស់កម្លាំងលើកោះតៃវ៉ាន់ឡើយ។

ទោះបីជាយ៉ាងណាក៏ដោយ ទីក្រុងតៃប៉ិ និយាយថា មានតែប្រជាជន ២៣ លាននាក់របស់កោះនេះប៉ុណ្ណោះ ដែលអាចសម្រេចអនាគតរបស់ពួកគេបាន៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ អាមេរិកព្រមាន! ចិន អាចវាយយកកោះ តៃវ៉ាន់ នៅឆ្នាំនេះតែម្តង