រំលង ១ ថ្ងៃ ហេតុការណ៍រត់ជាន់គ្នាកើតឡើងនៅប្រទេសមួយទៀត បន្ទាប់ពីកូរ៉េខាងត្បូង

កាលពីថ្ងៃសៅរ៍ទី២៩ខែតុលា ប្រទេសកូរ៉េខាងត្បូង បានជួបហេតុការណ៍ដ៏រន្ធត់ នោះគឺជាការរត់ជាន់គ្នាអំឡុងការប្រារព្ធពិធីបុណ្យ Halloween ដោយបណ្តាលឲ្យមនុស្ស ១៥៤នាក់ បាត់បង់ជីវិត។

ដោយឡែក កាលពីថ្ងៃអាទិត្យម្សិលមិញនេះ មនុស្ស១១នាក់ បានស្លាប់ ក្នុងការរត់ជាន់គ្នានៅឯការប្រគំតន្ត្រីក្នុងកីឡដ្ឋានដ៏ធំបំផុតមួយ នៅរដ្ឋធានីរបស់សាធារណរដ្ឋប្រជាធិបតេយ្យកុងហ្គោ។

រដ្ឋមន្ត្រីមហាផ្ទៃលោក Daniel Aselo Okito បានស្តីបន្ទោសអ្នករៀបចំ សម្រាប់ការស្លាប់នេះ ដោយនិយាយថា ព្រឹត្តិការណ៍ប្រគំតន្ត្រីនៅកីឡដ្ឋាន Martyrs ក្នុងទីក្រុង Kinshasa បានដាក់មនុស្សលើសពីសមត្ថភាព។

អ្នកសារព័ត៌មានរ៉យទ័រនៅឯការប្រគំតន្ត្រី បាននិយាយថា កីឡដ្ឋាននេះ ដាក់មនុស្សលើសពីសមត្ថភាពផ្ទុក ៨០០០០នាក់របស់ខ្លួន ហើយមនុស្សមួយចំនួនបានសម្រុកចូលទៅកន្លែង VIP និងកន្លែងដែលគេបម្រុងទុក។

មុននេះ កងកម្លាំងសន្តិសុខបានបាញ់ឧស្ម័នបង្ហូរទឹកភ្នែក ដើម្បីបំបែកហ្វូងមនុស្សដែលបង្កអំពើហិង្សានៅតាមដងផ្លូវ ខាងក្រៅកីឡដ្ឋាន ជាកន្លែងដែលមនុស្សជាច្រើន បានប្រមូលផ្តុំគ្នាមុនការប្រគុំតន្ត្រីដោយ Ipupa ដែលមានដើមកំណើតនៅទីក្រុង Kinshasa។

សិល្បករវ័យ ៤៤ឆ្នាំរូបនេះ គឺជាតន្ត្រីករឈានមុខម្នាក់នៅអាហ្វ្រិក ដែលអាល់ប៊ុមរបស់គាត់បានលក់ទូទាំងពិភពលោក៕

ប្រែសម្រួល៖ Vann Vann

ប្រភព៖ Aljazeera, BBC

ចុចអាន៖ ខ្លីៗគួរដឹងពី Itaewon ដែលជាទីតាំងកើតឧបទ្ទវហេតុរត់ជាន់គ្នា