ឆ្នាំក្រោយៗ បុណ្យ Halloween អាចត្រូវហាមឃាត់នៅ កូរ៉រខាងត្បូង

ក្រោយកើតឧបទ្ទវហេតុរត់ជាន់គ្នានៅតំបន់ Itaewon សកម្មភាពនានាទាក់ទងនឹងពិធីបុណ្យ Halloween អាចនឹងក្លាយទៅជាបំរាមក្នុងឧស្សាហកម្មកម្សាន្ត នៅលើទឹកដីកូរ៉េខាងត្បូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីសោកនាដកម្មរត់ជាន់គ្នា កាលពីយប់ថ្ងៃទី២៩ ខែតុលា នៅសង្កាត់ Itaewon បានកន្លងផុតទៅជាច្រើនថ្ងៃហើយក្តី ប៉ុន្តែឧបទ្ទវហេតុនេះនៅតែធ្វើឱ្យប្រជាជនកូរ៉េ ក៏ដូចជាពិភពលោកទាំងមូល នឹកចាំពីការឈឺចាប់ និងការបាត់បង់សមាជិកគ្រួសារមិនអាចបំភ្លេចបាន។

គិតត្រឹមដំណាច់ថ្ងៃទី២ ខែវិច្ឆិកា ចំនួនអ្នកដែលមិនរួចរស់រានមានជីវិតពីការរត់ជាន់គ្នាបានកើនឡើងដល់ ១៥៦នាក់ ហើយមនុស្សចំនួន ១៧២នាក់បានរងរបួស។ ដើម្បី​រំលឹក​ដល់​ជនរងគ្រោះ​ដែល​បាន​បាត់បង់​ជីវិត​ លោក​ប្រធានាធិបតី Yoon Suk Yeol បាន​ប្រកាស​​កាន់​ទុក្ខ​ជាតិរយៈពេល​មួយ​សប្តាហ៍​គឺ​ចាប់​ពី​ថ្ងៃ​ទី៣០ ខែ​តុលា ដល់​ថ្ងៃ​ទី ៥ ខែ​វិច្ឆិកា ឆ្នាំ២០២២។

បន្ទាប់ពីហេតុការណ៍នេះ សកម្មភាពនានាពាក់ព័ន្ធនឹងពិធីបុណ្យ Halloween បាន​ក្លាយ​ជា​ប្រធានបទ​ដ៏​រសើបសម្រាប់​ប្រជាជន​កូរ៉េ ហើយបុណ្យបែបអឺរ៉ុបមួយនេះអាចត្រូវហាមឃាត់ នៅឆ្នាំក្រោយៗទៀត។ យោងតាមប្រព័ន្ធផ្សព្វផ្សាយមួយចំនួននៅក្នុងប្រទេសបានឱ្យដឹងថា ទៅថ្ងៃអនាគត កម្មវិធី ឬព្រឹត្តិការណ៍ណាមួយដែលទាក់ទងនឹងបុណ្យ Halloween ទំនងជាមិនត្រូវបានធ្វើឡើង ឬអនុញ្ញាតនៅប្រទេសកូរ៉េនោះទេ។

ការលើកឡើងបែបនេះ ស្របពេលដែលពេលថ្មីៗនេះ មិនថាភាពយន្ត ឬកម្មវិធីកម្សាន្តអ្វីក៏ដោយដែលទាក់ទងនឹងពិធីបុណ្យ Halloween ត្រូវតែកែសម្រួល ឬដកចេញទាំងស្រុងពីវេទិកា មិនអ៊ីចឹង នឹងមិនអនុញ្ញាតឱ្យចាក់ផ្សាយនោះទេ។ ទោះយ៉ាងណា ព័ត៌មានផ្លូវការពីមន្ត្រីពាក់ព័ន្ធ នៅមានមិនទាន់ប្រកាសនៅឡើយ៕

ប្រែសម្រួល៖ សន្យា

ចុចអាន៖ លម្អិតអំពីហេតុការណ៍រត់ជាន់គ្នានៅ កូរ៉េខាងត្បូង (មានវីដេអូ)