អនុប្រធានាធិបតីអាហ្សង់ទីន ត្រូវកាត់ទោសឲ្យជាប់ពន្ធនាគារ ៦ឆ្នាំ ពីបទពុករលួយ

កាលពីថ្ងៃអង្គារទី០៦ខែធ្នូ អនុប្រធានាធិបតីអាហ្សង់ទីនលោកស្រី Cristina Fernandez de Kirchner ត្រូវបានរកឃើញថា មានពិរុទ្ធពីបទពុករលួយ ហើយត្រូវបានកាត់ទោសឲ្យជាប់ពន្ធនាគាររយៈពេល៦ឆ្នាំ រួមជាមួយនឹងបម្រាម មិនឲ្យកាន់តំណែងជាសាធារណៈអស់មួយជីវិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ លោកស្រីនឹងនៅតែមានសេរីភាពរហូតដល់ចប់អាណត្តិ ដោយសារតែអភ័យឯកសិទ្ធិ។

តុលាការសហព័ន្ធនៅទីក្រុង ប៊ុយណូស៊ែ បានប្រកាសសាលក្រម បន្ទាប់ពីដំណើរការរយៈពេល៣ឆ្នាំកន្លះ ដែលរួមមានសាក្សីជាង១០០នាក់។

លោកស្រី Kirchner អាយុ៦៩ឆ្នាំ ត្រូវបានចោទប្រកាន់ពីបទទទួលសំណូក និងបើកសមាគមខុសច្បាប់ជាមួយមហាសេដ្ឋីសំណង់ម្នាក់ អំឡុងពេលកាន់តំណែងជាប្រធានាធិបតីចន្លោះឆ្នាំ ២០០៧ ដល់ ២០១៥។

លោកស្រី Kirchner បានធ្វើជាអនុប្រធានាធិបតី និងជាប្រធានព្រឹទ្ធសភាអាហ្សង់ទីន ចាប់តាំងពីខែធ្នូ ឆ្នាំ២០១៩មក ហើយអាចដកអភ័យឯកសិទ្ធិបាន លុះត្រាតែមានសឡេងពីរភាគបីនៅក្នុងសភា ដែលរឿងនេះទំនងជាមិនអាចទៅរួចនោះទេ។ លោកស្រី​ក៏​មាន​ជម្រើស​ក្នុង​ការ​ប្តឹង​ឧទ្ធរណ៍​ចំពោះ​សាលក្រម​នេះ ​ទៅ​តុលាការ​កំពូលផងដែរ។

សាលក្រមកាលពីថ្ងៃអង្គារ គឺជាលើកទីមួយហើយ ដែលអនុប្រធានាធិបតីនៅក្នុងប្រទេសអាហ្សង់ទីន ត្រូវបានកាត់ទោសពីបទប្រព្រឹត្តខុសក្នុងពេលកាន់តំណែង។

យ៉ាងណាក្តី លោកស្រី Kirchner បានបដិសេធការចោទប្រកាន់ទាំងអស់ ហើយហៅដំណើរការនេះថាជាការចោទប្រកាន់ផ្នែកនយោបាយ និងបង្កឡើងដោយភាពមិនប្រក្រតី៕

ប្រែសម្រួល៖ Vann Vann

ប្រភព៖ RT

ចុចអាន៖ វីដេអូ អនុប្រធានាធិបតីអាហ្សង់ទីន ប៊ិះត្រូវខ្មាន់កាំភ្លើងធ្វើឃាត