​អាល្លឺម៉ង់ ចាប់បាន​ក្រុម​ភេរវករ​ស្តាំ​និយម​ ដែលគ្រោង​ ធ្វើរដ្ឋប្រហារ ​ផ្ដួលរំលំ​រដ្ឋាភិបាល

នៅថ្ងៃពុធទី០៧ខែធ្នូនេះ ប៉ូលិសរាប់ពាន់នាក់ បានបើកការវាយឆ្មក់ជាបន្តបន្ទាប់នៅទូទាំងប្រទេសអាល្លឺម៉ង់ ប្រឆាំងនឹងក្រុមជ្រុលនិយមដែលគេសង្ស័យថា ព្យាយាមផ្តួលរំលំរដ្ឋដោយប្រើអំពើហិង្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋអាជ្ញាសហព័ន្ធនិយាយថា មន្ត្រីប្រហែល ៣០០០នាក់ បានធ្វើការឆែកឆេរនៅទីតាំងចំនួន១៣០ក្នុងរដ្ឋចំនួន១១ នៃរដ្ឋទាំង១៦របស់ប្រទេសអាល្លឺម៉ង់ ប្រឆាំងនឹងចលនា Reich Citizens។

សមាជិក​មួយ​ចំនួន​នៃ​ក្រុម​នេះ​ បានបដិសេធទទួលស្គាល់​រដ្ឋធម្មនុញ្ញ​ក្រោយ​សង្គ្រាម​របស់​ប្រទេស​អាល្លឺម៉ង់ ហើយ​បាន​អំពាវនាវ​ឲ្យ​ផ្តួលរំលំ​រដ្ឋាភិបាល។

រដ្ឋអាជ្ញានិយាយថា ពលរដ្ឋអាល្លឺម៉ង់ចំនួន២២នាក់​ ត្រូវបានចាប់ខ្លួនដោយសង្ស័យថាជាសមាជិកនៅក្នុងអង្គការភេរវករ។ មនុស្សបីនាក់ផ្សេងទៀត រួមទាំងពលរដ្ឋរុស្ស៊ីម្នាក់ផងដែរ ត្រូវបានគេសង្ស័យថា គាំទ្រអង្គការនេះ។

យោងតាមការចុះផ្សាយរបស់កាសែត Der Spiegel, ទីតាំងដែលត្រូវឆែកឆេររួមមាន បន្ទាយកងកម្លាំងពិសេសរបស់អាល្លឺម៉ង់ KSK នៅទីក្រុង Calw។ អង្គភាព​នេះ ​ធ្លាប់​ត្រូវ​បាន​ពិនិត្យតាមដាន​លើ​ការ​ចោទ​ប្រកាន់​ថា​ មាន​ជាប់ពាក់ព័ន្ធជាមួយ​ទាហាន​ស្តាំ​ជ្រុល​មួយ​ចំនួន។

ទន្ទឹមនឹងការចាប់ខ្លួននៅប្រទេសអាល្លឺម៉ង់ រដ្ឋអាជ្ញានិយាយថា មនុស្សម្នាក់ ក៏ត្រូវបានឃុំខ្លួននៅទីក្រុង Kitzbuehel នៃប្រទេសអូទ្រីស និងម្នាក់ទៀតនៅទីក្រុង Perugia នៃប្រទេសអ៊ីតាលីផងដែរ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ រុស្ស៊ី ថា អាល្លឺម៉ង់ បានឆ្លងកាត់ខ្សែបន្ទាត់ក្រហមហើយ