ព័ត៌មានអន្ដរជាតិ

អូស្រ្តាលី ខឹងសម្បា បន្ទាប់ពីឥណ្ឌូណេស៊ី ដោះលែងអ្នកជាប់ពាក់ព័ន្ធការបំផ្ទុះគ្រាប់បែក លើកោះ បាលី

បានផុស

៣ years មុន

នៅ

ថ្ងៃព្រហស្បតិ៍ ៨ ធ្នូ ២០២២

ដោយ

អ្នករស់រានមានជីវិតពីការបំផ្ទុះគ្រាប់បែកលើកោះបាលីឆ្នាំ២០០២ បាននិយាយនៅថ្ងៃព្រហស្បតិ៍ទី០៨ខែធ្នូនេះថា វាជារឿងគួរឲ្យអស់សំណើច ដែលឃើញអ្នកផលិតគ្រាប់បែកម្នាក់ ត្រូវបានដោះលែងពីពន្ធនាគារបន្ទាប់ពីអនុវត្តទោសពាក់កណ្តាល នៃទោសជាប់ពន្ធនាគារ២០ឆ្នាំរបស់គាត់។

លោក Umar Patek គឺជាសមាជិកនៃក្រុមមានទំនាក់ទំនងនឹងអាល់កៃដា ដែលបានបំផ្ទុះគ្រាប់បែកពីរគ្រាប់ នៅខាងក្រៅបារ៍និងក្លិបរាត្រីលើកោះបាលី ក្នុងខែតុលាឆ្នាំ២០០២ ដោយបានសម្លាប់មនុស្សចំនួន២០២នាក់ រួមទាំងជនជាតិអូស្ត្រាលី៨៨នាក់ផងដែរ។

តាមការបញ្ជាក់ពីអាជ្ញាធរឥណ្ឌូណេស៊ី លោក Patek ត្រូវបានដោះលែងកាលពីថ្ងៃពុធទី០៧ខែធ្នូ បើទោះបីជាមានការអង្វរករម្តងហើយម្តងទៀត ពីរាជរដ្ឋាភិបាលអូស្ត្រាលីឲ្យបន្តដាក់គាត់ក្នុងពន្ធនាគារក៏ដោយ។

ជនជាតិអូស្ត្រាលីម្នាក់ឈ្មោះ Peter Hughes ដែលជាអ្នករស់រានមានជីវិតពីការវាយប្រហារ បាននិយាយថា ជនជ្រុលនិយមដែលត្រូវបានកាត់ទោស សមនឹងទទួលទោសដ៏ឃោឃៅបំផុត។ លោកបានប្រាប់ទូរទស្សន៍ ABC អូស្ត្រាលីថា “ការដែលដោះលែងនេះ វាគឺជារឿងគួរឲ្យអស់សំណើចបំផុត”។

ទោះបីជាយ៉ាងណាក៏ដោយ អាជ្ញាធរឥណ្ឌូណេស៊ីនិយាយថា ពួកគេជឿថា Patek បានកែខ្លួនហើយនៅក្នុងពន្ធនាគារ បន្ទាប់ពីបានបញ្ចប់កម្មវិធីកម្ចាត់ភាពជ្រុលនិយមរ៉ាឌីកាល់។

ស្របពេលជាមួយគ្នានោះដែរ ឧបនាយករដ្ឋមន្ត្រីអូស្ត្រាលីលោក Richard Marles បានជំរុញឲ្យប្រទេសឥណ្ឌូនេស៊ី បន្តឃ្លាំមើល Patek ជានិច្ច។ គាត់បានប្រាប់ ABC ថា “ខ្ញុំគិតថា ថ្ងៃនេះនឹងក្លាយជាថ្ងៃដ៏លំបាកសម្រាប់ប្រជាជនអូស្ត្រាលីជាច្រើន”។

ចំណែកលោក Chris Bowen រដ្ឋមន្ត្រីក្រសួងថាមពល និងបម្រែបម្រួលអាកាសធាតុអូស្ត្រាលីក៏បានប្រាប់ទូរទស្សន៍ ABC ផងដែរនៅថ្ងៃព្រហស្បតិ៍នេះថា ការដោះលែងលោក Patek គឺជាក្តីព្រួយបារម្ភសម្រាប់ប្រជាជនអូស្ត្រាលីទាំងអស់ ប៉ុន្តែទំនងជាមិនប៉ះពាល់ដល់ទំនាក់ទំនងទ្វេភាគីនោះទេ៕

ប្រែសម្រួល៖ Vann Vann

ប្រភព៖ JP

ចុចអាន៖ តួកគី ចាប់ខ្លួនមនុស្ស២២នាក់ ពាក់ព័ន្ធការបំផ្ទុះគ្រាប់បែក