រុស្ស៊ី ថា ទាហានអាមេរិករាប់រយនាក់ កំពុងស្ថិតនៅក្នុងប្រទេស អ៊ុយក្រែន

រដ្ឋមន្ត្រីការបរទេសរុស្ស៊ី លោក Sergey Lavrov បានចោទប្រកាន់ថា ទាហានអាមេរិករាប់រយនាក់ ត្រូវបានដាក់ពង្រាយទៅកាន់ប្រទេសអ៊ុយក្រែន។ លោកអះអាងថា ទាហានអាមេរិក ទីប្រឹក្សាយោធា និងមន្ត្រីចារកម្ម គឺជាអ្នកចូលរួមដោយផ្ទាល់នៅក្នុងជម្លោះជាយូរមកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសន៍ជាមួយទូរទស្សន៍ប៉ុស្តិ៍លេខ១ របស់រុស្ស៊ីកាលពីថ្ងៃព្រហស្បតិ៍ទី២៩ខែធ្នូ លោក Lavrov បាននិយាយវែងអន្លាយ អំពីការលូកដៃយ៉ាងជ្រៅរបស់ទីក្រុងវ៉ាស៊ីនតោនក្នុងអរិភាពនៅអ៊ុយក្រែន ខណៈភាពតានតឹងបានកើនឡើងជាលំដាប់ បើទោះបីជាមានការធានាម្តងហើយម្តងទៀតពីមេដឹកនាំអាមេរិកថា យោធាអាមេរិកនឹងមិនមានតួនាទីក្នុងការប្រយុទ្ធក៏ដោយ។

លោករដ្ឋមន្ត្រីបាននិយាយថា “កងទ័ពអាមេរិករាប់សិបនាក់ ឬប្រហែលជាឈានដល់រយនាក់ កំពុងស្ថិតនៅក្នុងប្រទេសអ៊ុយក្រែន។ ពួកគេនៅទីនោះ សូម្បីតែមុនពេលផ្ទុះរដ្ឋប្រហារក៏ដោយ”។ លោកបាននិយាយបែបនេះ ដោយសំដៅទៅរដ្ឋប្រហារឆ្នាំ២០១៤ ទម្លាក់ប្រធានាធិបតីអ៊ុយក្រែនលោក Viktor Yanukovich ដោយសកម្មជនជាតិនិយម និងសកម្មជនគាំទ្រលោកខាងលិច។

លោក Lavrov ក៏អះអាងដែរថា អនុព័ន្ធយោធាអាមេរិកដែលមានមូលដ្ឋាននៅទីក្រុងកៀវ បានផ្តល់ដំបូន្មានសំខាន់ៗដល់អាជ្ញាធរអ៊ុយក្រែន។ លោកនិយាយថា “អ្នកឯកទេសយោធាបានចូលរួមជាក់ស្តែង មិនត្រឹមតែធ្វើទស្សនកិច្ចនៅក្រសួងការពារជាតិអ៊ុយក្រែនប៉ុណ្ណោះទេ ប៉ុន្តែថែមទាំងផ្តល់ការប្រឹក្សាដោយផ្ទាល់ ហើយប្រហែលជាច្រើនជាងការផ្តល់ប្រឹក្សាទៅទៀត”។

លោកបានកត់សម្គាល់ថា ក្រុមអ្នកឯកទេសអាមេរិកដាច់ដោយឡែកមួយក្រុម បានធ្វើដំណើរទៅអ៊ុយក្រែន ដើម្បីតាមដានលំហូរនៃអាវុធរបស់លោកខាងលិចទៅកាន់ប្រទេសនេះ ដែលត្រូវបានបង្កើតឡើងបន្ទាប់ពីសមាជិកសភាអាមេរិកទាមទារឲ្យមានយន្តការដ៏រឹងមាំបន្ថែមទៀត សម្រាប់ការតាមដានជំនួយ។

លោក Lavrov បន្តអះអាងថា រដ្ឋលោកខាងលិចបានប្រកាសសង្រ្គាមលើប្រទេសរុស្ស៊ីអស់រយៈពេលជិតមួយទសវត្សរ៍មកហើយ ភ្លាមៗបន្ទាប់ពីបដិវត្តន៍ Euromaidan ឆ្នាំ២០១៤។ ក្រោយមកសហរដ្ឋអាមេរិក និងអង្គការណាតូ បានបន្តគាំទ្រផ្នែកយោធាដល់រដ្ឋាភិបាលក្រោយរដ្ឋប្រហារ។

រហូតមកដល់ពេលនេះ ទីក្រុងវ៉ាស៊ីនតោនបានផ្តល់ជំនួយយោធាដោយផ្ទាល់ក្នុងទំហំទឹកប្រាក់ជាង២០ពាន់លានដុល្លារ ដល់អ៊ុយក្រែន ដោយមិនរាប់បញ្ចូលគំនិតផ្តួចផ្តើមជំនួយសន្តិសុខអ៊ុយក្រែន ដាច់ដោយឡែក និងទឹកប្រាក់រាប់ពាន់លានបន្ថែមទៀតនៅក្នុងជំនួយសេដ្ឋកិច្ច និងមនុស្សធម៌នោះទេ៕

ប្រែសម្រួល៖ Vann Vann

ប្រភព៖ RT

ចុចអាន៖ គ្រូវេទមន្ត មើលឃើញពេលវេលា ដែលសង្គ្រាមរុស្ស៊ី-អ៊ុយក្រែន នឹងបញ្ចប់