លោក Trump ត្រូវបានតែងតាំងជាប្រធានសភា អាមេរិក (មានវីដេអូ)

លោក Matt Gaetz សមាជិកសភាមកពីគណបក្សសាធារណរដ្ឋបានតែងតាំងអតីតប្រធានាធិបតីអាមេរិកលោក Donald Trump ជាផ្លូវការឲ្យដឹកនាំសភាតំណាងរាស្រ្ត ខណៈដែលសមាជិកទាំងនោះបានបរាជ័យក្នុងការជ្រើសរើសប្រធានសភាជាលើកទី ១១ ជាប់ៗគ្នា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Gaetz បានសរសេរនៅលើបណ្ដាញ Twitter បន្ទាប់ពីបានតែងតាំងអតីតប្រធានាធិបតីអាមេរិកទី ៤៥ ក្នុងអំឡុងពេលបោះឆ្នោតសភាថា “ខ្ញុំបោះឆ្នោតជូនលោក Donald Trump ជាប្រធានសភា ។ នេះជាការផ្លាស់ប្ដូរមួយ ពីព្រោះរដ្ឋធម្មនុញ្ញរបស់សហរដ្ឋអាមេរិកមិនបានបញ្ជាក់ថា ប្រធានសភាត្រូវតែមានកៅអីក្នុងសភានោះទេ ដោយសារកន្លងមកមានតែសមាជិកដែលអង្គុយក្នុងសភាប៉ុណ្ណោះដែលត្រូវបានជ្រើសរើសឲ្យធ្វើជាប្រធានសភា” ។

គណបក្ស​សាធារណរដ្ឋ​ដែលបាន​កាន់កាប់​សភា​ឡើងវិញ​ ​អំឡុង​ការបោះឆ្នោត​ពាក់កណ្តាល​អាណត្តិ​ក្នុង​ខែវិច្ឆិកា បាននឹងកំពុងព្យាយាមរកអ្នកជំនួសតំណែងលោកស្រី Nancy Pelosi មកពីបក្សប្រជាធិបតេយ្យ ជាប្រធានសភា ដោយសារតែសមាជិកសភាមកពីគណបក្សសាធារណរដ្ឋចំនួន ២០ បានបដិសេធមិនគាំទ្រលោក Kevin McCarthy សម្រាប់តំណែងនេះ ដោយបោះឆ្នោតឲ្យបេក្ខជនផ្សេងទៀតជំនួសវិញ ។

ពាក់ព័ន្ធនឹងបញ្ហានេះដែរ លោក Trump ខ្លួនគាត់ផ្ទាល់ក៏បានគាំទ្របេក្ខភាពប្រធានសភារបស់លោក McCarthy ផងដែរ ដោយជំរុញឲ្យសមាជិកសភាមកពីគណបក្សសាធារណរដ្ឋបោះឆ្នោតឲ្យលោក McCarthy ធ្វើជាប្រធានសភា ដើម្បីបិទបញ្ចប់បញ្ហាដែលមិនធ្លាប់កើតមានក្នុងរយៈពេល ១៦០ ឆ្នាំ ក៏ដូចជាកុំឲ្យមានភាពអាម៉ាស់ក្នុងគណបក្សផងដែរ ។

គួរបញ្ជាក់ថា ដើម្បីក្លាយជាប្រធានសភា បេក្ខជនម្នាក់ ត្រូវទទួលបានសំឡេងឆ្នោតច្រើនជាងពាក់កណ្តាលនៃអ្នកតំណាងចំនួន ៤៣៥ របស់សភា ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ ក្រុមកូនស្ដេចគ្រឿងញៀន El Chapo កំពុងបង្កការបង្ហូរឈាមសម្លាប់​មនុស្ស ២៩ នាក់ (មានវីដេអូ)