ព័ត៌មានអន្ដរជាតិ

ណាតូ សន្យាផ្តល់អាវុធធុនធ្ងន់បន្ថែមទៀត ជួយអ៊ុយក្រែន (មានវីដេអូ)

បានផុស

២ ខែ មុន

នៅ

ថ្ងៃចន្ទ ១៦ មករា ២០២៣

ដោយ

អគ្គលេខាធិការអង្គការណាតូ លោក Jens Stoltenberg បាននិយាយកាលពីថ្ងៃអាទិត្យទី១៥ខែមករាថា អ៊ុយក្រែននឹងទទួលបាន “ឧបករណ៍សង្គ្រាមធុនធ្ងន់” បន្ថែមទៀតពីប្រទេសលោកខាងលិច នៅក្នុងពេលអនាគតដ៏ខ្លីខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចក្រភពអង់គ្លេស បានសន្យាផ្តល់រថក្រោះដល់ប្រទេសនេះរួចទៅហើយ ចំណែកឯអាល្លឺម៉ង់ កំពុងស្ថិតក្រោមសម្ពាធឲ្យធ្វើតាមគេ។

ប៉ុន្មានថ្ងៃបន្ទាប់ពីកងកម្លាំងរុស្ស៊ី ដណ្តើមយកបានទីក្រុង Soledar ដ៏សំខាន់ក្នុងតំបន់ Donbass លោក Stoltenberg បានប្រាប់កាសែត Handelsblatt របស់អាល្លឺម៉ង់ថា “យើងកំពុងស្ថិតក្នុងដំណាក់កាលសំខាន់នៃសង្រ្គាម។ ដូច្នេះវាសំខាន់ណាស់ដែលយើងចាំបាច់ត្រូវបំពាក់អាវុធដល់អ៊ុយក្រែន តាមដែលពួកគេត្រូវការដើម្បីអាចឈ្នះបាន”។

ក្នុងរយៈពេលប៉ុន្មានសប្តាហ៍ថ្មីៗនេះ គេឃើញថា មហាអំណាចធំៗរបស់អង្គការណាតូបានសន្យាផ្តល់សព្វាវុធកាន់តែច្រើនដល់អ៊ុយក្រែន។

សហរដ្ឋអាមេរិក បារាំង និងអាល្លឺម៉ង់បានប្រកាសក្នុងពេលដំណាលគ្នាកាលពីដើមខែនេះថា ពួកគេនឹងបរិច្ចាគយានប្រយុទ្ធថ្មើរជើងដល់យោធាអ៊ុយក្រែន ខណៈចក្រភពអង់គ្លេសបានបញ្ជាក់ជាផ្លូវការកាលពីថ្ងៃសៅរ៍ថា ខ្លួននឹងបញ្ជូនរថក្រោះប្រយុទ្ធសំខាន់ Challenger 2 ចំនួន១៤គ្រឿង។

កញ្ចប់សព្វាវុធបន្ថែមទៀត ទំនងជានឹងត្រូវបានប្រកាសបន្ទាប់ពីក្រុមទំនាក់ទំនងការពារ ដែលដឹកនាំដោយសហរដ្ឋអាមេរិកជួបប្រជុំគ្នានៅថ្ងៃសុក្រ នៅមូលដ្ឋានទ័ពអាកាស Ramstein ក្នុងប្រទេសអាល្លឺម៉ង់។

ក្រុមប្រឹក្សានៃប្រទេសជិត៥០នេះ បានជួបប្រជុំគ្នាចំនួន៧ដងរួចមកហើយ ចាប់តាំងពីប្រតិបត្តិការយោធារបស់រុស្ស៊ីនៅអ៊ុយក្រែន ផ្ទុះឡើងកាលពីខែកុម្ភៈឆ្នាំមុន ដោយកិច្ចប្រជុំនីមួយៗតែងតែមានការសន្យាថ្មីៗនៃជំនួយយោធាពីអាមេរិក និងសម្ព័ន្ធមិត្តរបស់ខ្លួន៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ ណាតូ និង EU ប្តេជ្ញាគាំទ្រ អ៊ុយក្រែន បន្ថែមទៀត