លោក គីម ជុងអ៊ុន ទទួលបានមុខតំណែងស្នងឪពុក

បើយោងតាមប្រព័ន្ធផ្សព្វផ្សាយរដ្ឋ KCNA បាននិយាយនៅថ្ងៃចន្ទ ទី ១១ ខែមករា នេះថា មេដឹកនាំកូរ៉េខាងជើងលោក គីម ជុងអ៊ុន ត្រូវបានគេបោះឆ្នោតជ្រើសរើសជាអគ្គលេខាធិការនៃគណបក្សពលករដែលកំពុងកាន់អំណាចដោយទទួលយកតំណែងនេះពីឪពុករបស់លោកនៅក្នុងចលនាមួយដែលត្រូវបានគេមើលឃើញថាមានគោលបំណងពង្រឹងអំណាចរបស់លោកបន្ថែមទៀត ។

ការបោះឆ្នោតបានធ្វើឡើងនៅថ្ងៃអាទិត្យក្នុងសមាជរបស់គណបក្សនេះដែលត្រូវបានរៀបចំឡើងសម្រាប់លោក គីម ដើម្បីដាក់ចេញនូវផែនការសម្រាប់គោលនយោបាយការទូត យោធា និងសេដ្ឋកិច្ចរបស់លោកក្នុងរយៈពេល ៥ ឆ្នាំខាងមុខ និងធ្វើការសម្រេចចិត្តបញ្ហាសំខាន់ៗទាំងនេះ ។

KCNA បាននិយាយថា សមាជនេះបានអនុម័តយ៉ាងពេញលេញនូវសំណើសម្រាប់ការលើកលោក គីម ទៅជាអគ្គលេខាធិការគណបក្សដោយហៅមុខតំណែងនេះថាជា “មេដឹកនាំបដិវត្តន៍ មគ្គុទេសក៍ និងឯកភាពជាតិ” ។

លោក គីម បានកាន់កាប់អំណាចស្ទើរតែទាំងស្រុងក្នុងការគ្រប់គ្រងប្រទេសកូរ៉េខាងជើង ចាប់តាំងពីឪពុករបស់លោកគឺលោក គីម ជុងអ៊ីល បានទទួលមរណភាពក្នុងឆ្នាំ ២០១១ ។ នៅឆ្នាំ ២០១២ គណបក្សនេះបានតែងតាំងលោក គីម ជុងអ៊ីល ជាអគ្គលេខាធិការគណបក្សជារៀងរហូត ហើយលោក គីមជុងអ៊ុន ជាលេខាទីមួយនៃគណបក្ស ។

KCNA បាននិយាយថា គណបក្សក៏បានរៀបចំការបោះឆ្នោតសម្រាប់គណៈកម្មាធិការកណ្តាលរបស់ខ្លួនជាស្ថាប័នគ្រប់គ្រងដ៏សំខាន់មួយដែលរួមបញ្ចូលទាំងអ្នកនយោបាយដ៏មានឥទ្ធិពលផងដែរ ។

ស្របពេលជាមួយគ្នានេះលោកស្រី គីម យ៉ូជុង ដែលជាប្អូនស្រីរបស់លោក គីម ជុងអ៊ុន និងជាមន្ត្រីជាន់ខ្ពស់នៃគណបក្សដែលកាលពីមុនជាសមាជិកបេក្ខជននៃការិយាល័យនយោបាយ មិនមានឈ្មោះនៅក្នុងបញ្ជីបោះឆ្នោតនោះទេដែលធ្វើឲ្យមានការរំពឹងទុកជាទូទៅពីអ្នកសង្កេតការណ៍នៃរបបផ្តាច់ការ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ គីម ជុងអ៊ុន៖ ទោះអ្នកណាកាន់អំណាចក៏ដោយ អាមេរិកនៅតែជា “សត្រូវធំបំផុត” របស់កូរ៉េខាងជើង

ចុចអាន ៖ លោក គីម ជុងអ៊ុន បង្ហាញឯកសណ្ឋានយោធាពណ៌សថ្មីជាលើកដំបូង