លោក ពូទីន កំណត់បេសកកម្មសម្រាប់យោធា រុស្ស៊ី

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយកាលពីថ្ងៃពុធទី០១ខែកុម្ភៈថា អ៊ុយក្រែនមិនគួរមានសមត្ថភាពកំណត់គោលដៅតំបន់ព្រំដែនរុស្ស៊ីនោះទេ។ លោកបន្ថែមថា នេះគឺជាបេសកកម្មសម្រាប់ក្រសួងការពារជាតិនៅទីក្រុងមូស្គូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអត្ថាធិប្បាយរបស់លោកបានកើតឡើងមួយថ្ងៃ បន្ទាប់ពីការបាញ់ផ្លោងរបស់អ៊ុយក្រែន បានវាយប្រហារនៅជិតបំពង់បង្ហូរប្រេងក្នុងតំបន់ Bryansk ហើយចំពេលមានពាក្យចចាមអារ៉ាមថា សហរដ្ឋអាមេរិក កំពុងរៀបចំផ្តល់មីស៊ីលរយៈចម្ងាយឆ្ងាយ ឲ្យទីក្រុងកៀវ។

ក្នុងអំឡុងសន្និសីទវីដេអូអំពីការងារហេដ្ឋារចនាសម្ព័ន្ធនៅតំបន់ព្រំដែននៃទីក្រុង Belgorod, Bryansk និង Kursk ក៏ដូចជា Crimea លោក ពូទីន និយាយថា “ជាការពិត បេសកកម្មអាទិភាពគឺដើម្បីលុបបំបាត់លទ្ធភាពនៃការវាយប្រហារ ប៉ុន្តែនោះជាភារកិច្ចសម្រាប់យោធា”។

ក្នុងកិច្ចប្រជុំនោះដែរ ឧបនាយករដ្ឋមន្ត្រី Marat Khusnullin បាននិយាយថា អ្នកភូមិប្រមាណ ៣៧០០នាក់ ក្នុងតំបន់ Belgorod ត្រូវបានផ្លាស់ទីលំនៅដោយការវាយប្រហារកាំភ្លើងធំរបស់អ៊ុយក្រែន​ ប៉ុន្តែរដ្ឋាភិបាលបានត្រៀមថវិកាដើម្បីផ្តល់លំនៅដ្ឋាន និងអ្វីៗផ្សេងទៀតដែលពួកគេត្រូវការរួចហើយ។

អាជ្ញាធរនៅទីក្រុង Belgorod និង Bryansk បានរាយការណ៍អំពីការវាយប្រហារដោយកាំភ្លើងធំរបស់អ៊ុយក្រែនចំនួនពីរលើក កាលពីថ្ងៃអង្គារ។

នៅតំបន់ Bryansk មីស៊ីលមួយគ្រាប់បានធ្លាក់ចូលទៅក្នុងចម្ការមួយក្បែរស្ថានីយ៍រង នៃបំពង់បង្ហូរប្រេង Druzhba។ លំហូរប្រេងមិនរងផលប៉ះពាល់ទេ ប៉ុន្តែបុគ្គលិកកំពុងមានការប្រុងប្រយ័ត្នខ្ពស់ ។

យោងតាមរបាយការណ៍ពីតំបន់ប្រតិបត្តិការប្រយុទ្ធបានឲ្យដឹងថា ភូមិចំនួនបីនៅក្នុងតំបន់ Belgorod និងមួយនៅក្នុងទីក្រុង Kursk ក៏រងការវាយប្រហារដោយកាំភ្លើងធំ និងគ្រាប់រ៉ុកកែតរបស់អ៊ុយក្រែនផងដែរកាលពីថ្ងៃអង្គារ៕

ប្រែសម្រួល៖ Vann Vann

ប្រភព៖ RT

ចុចអាន៖ អ៊ុយក្រែន ព្រមានថា រុស្ស៊ី ប្រមូលផ្តុំកងទ័ព ៥០ម៉ឺននាក់រួចហើយ សម្រាប់វាយប្រហារ នៅថ្ងៃខួបនៃការលុកលុយ