ប្រមុខ UN ព្រមានថា សង្គ្រាមបង្ហូរឈាមនៅ អ៊ុយក្រែន នឹងកាន់តែរីកធំក្នុងឆ្នាំ ២០២៣ នេះ

អគ្គលេខាធិការអង្គការសហប្រជាជាតិ (UN) លោក Antonio Guterres កាលពីថ្ងៃចន្ទបានព្រមានថា សង្គ្រាមបង្ហូរឈាមពាក់ព័ន្ធជម្លោះនៅអ៊ុយក្រែន នឹងកាន់តែរីកធំសម្រាប់ឆ្នាំ ២០២៣ នេះ ។

ថ្លែងនៅក្នុងសុន្ទរកថាទៅកាន់មហាសន្និបាតដែលមានសមាជិក ១៩៣ នាក់, លោក Guterres បានលើកឡើងថា ប្រតិបត្តិការសឹករបស់រុស្ស៊ីលើអ៊ុយក្រែន កំពុងធ្វើឲ្យមានការឈឺចាប់ដែលមិនអាចបំភ្លេចបាន ដល់ប្រជាជនអ៊ុយក្រែន ហើយក៏បណ្ដាលឲ្យមានផលប៉ះពាល់យ៉ាងជ្រៅដល់សកលលោកផងដែរ ។

លោក Guterres បានបន្ថែមថា “ការរំពឹងទុកសម្រាប់សុខសន្តិភាពបន្តធ្លាក់ចុះ ទើបធ្វើឲ្យឱកាសនៃជម្លោះ និងការបង្ហូរឈាមបន្តកើនឡើង ។ ខ្ញុំគិតថា ពិភពលោកមិនមែនដេកលក់ទេ ហេតុអ្វីយើងមិនរួបរួមគ្នាដោះស្រាយបញ្ហាទាំងអស់នេះ ហើយហេតុអ្វីបែរជាបើកភ្នែកធំៗមើលរឿងរ៉ាវទាំងនោះកើតឡើងយ៉ាងដូច្នេះ” ។

ទន្ទឹមនោះ ប្រមុខ UN រូបនេះក៏បានលើកឡើងអំពីជម្លោះផ្សេងទៀតផងដែរ ដែលកំពុងគំរាមកំហែងដល់សន្តិភាព ដោយក្នុងនោះរួមមានជម្លោះអ៊ីស្រាអែល និងប៉ាឡេស្ទីន, អាហ្វហ្គានីស្ថាន, តំបន់សាហេល, មីយ៉ាន់ម៉ា និងហៃទីជាដើម ។

ជាចុងក្រោយលោក Guterres បញ្ជាក់ថា “វាដល់ពេលហើយដើម្បីធ្វើការផ្លាស់ប្តូរវិធីសាស្រ្តរបស់យើងឆ្ពោះទៅរកសុខសន្តិភាព ដោយដាក់បញ្ហាសិទ្ធិមនុស្ស និងសេចក្តីថ្លៃថ្នូរចូលទៅក្នុងធម្មនុញ្ញរបស់យើង ហើយប្រសិនបើប្រទេសនីមួយៗបានបំពេញកាតព្វកិច្ចរបស់ខ្លួនក្រោមធម្មនុញ្ញនេះហើយ សិទ្ធិទទួលបានសុខសន្តិភាព គឺនឹងត្រូវបានធានាជូន” ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ប្រទេសមួយនៅ អាស៊ី ប្រាប់ ណាតូ កុំឲ្យលូកដៃចូលជ្រៅពេកក្នុងសង្គ្រាម រុស្ស៊ី-អ៊ុយក្រែន