ថៃ ចេញច្បាប់ “ហាមដុតព្រៃឈើ” ដើម្បីទប់ស្កាត់បញ្ហាបំពុលខ្យល់

រដ្ឋាភិបាលថៃបានប្រកាសច្បាប់ “ហាមដុតព្រៃឈើ” ដើម្បីទប់ស្កាត់ការបំពុលខ្យល់ បន្ទាប់ពីប្រទេសនេះកំពុងមានបញ្ហាបំពុលបរិយាកាសយ៉ាងធ្ងន់ធ្ងរដែលបង្កឡើងដោយភ្លើងឆេះព្រៃ និងការឆេះដីស្រែចម្ការ ។

បច្ចុប្បន្នប្រទេសថៃកំពុងស្ថិតក្នុងរដូវប្រាំង ដោយកំហាប់ខ្យល់ពុល PM2.5 ឈានដល់កម្រិតខ្ពស់បំផុតនៅទូទាំងប្រទេស ខណៈនៅទីក្រុងបាងកក កម្រិតផ្សែងអ័ព្ទកាលពីថ្ងៃសុក្រ គឺច្រើនជាងស្តង់ដារអង្គការសុខភាពពិភពលោក (WHO) ដល់ទៅ ៦ ដងឯណោះ ។

ចំណែកមូលហេតុចម្បងនៃបញ្ហានេះ ត្រូវបានគេជឿថា បណ្ដាលមកពីភ្លើងឆេះព្រៃ និងការឆេះកសិដ្ឋាននៅភាគខាងជើងនៃប្រទេស ខណៈអាជ្ញាធរ​ក៏កំពុង​ជំរុញ​អ្នក​ជំងឺ​ផ្លូវដង្ហើមឲ្យ​ឈប់​ធ្វើ​សកម្មភាពនៅខាង​ក្រៅ​ផ្ទះផងដែរ ។

ពាក់ព័ន្ធនឹងបញ្ហានេះដែរ លោកនាយករដ្ឋមន្ត្រី ប្រាយុទ្ធ ចាន់អូចា បានបញ្ជាឲ្យហាមឃាត់ការដុតក្នុងកសិដ្ឋានទាំងអស់ រហូតដល់ចុងខែមេសា ហើយ​អ្នក​ណាហ៊ានបំពាន​​ប្រឈម​នឹង​ការ​ផាក​ពិន័យធ្ងន់ ក ។

ទន្ទឹមនោះ រដ្ឋាភិបាលបានបញ្ជាឲ្យអាជ្ញាធរបិទឧទ្យានជាតិ និងដែនជម្រកសត្វព្រៃចំនួន ៨ កន្លែង ដើម្បីកាត់បន្ថយភ្លើងឆេះព្រៃ ខណៈក៏ហាមឃាត់ដល់ប្រជាកសិករពីការដុតចម្ការរបស់ពួកគេផងដែរ ជាពិសេសគឺចម្ការអំពៅ បើទោះបីជាប្រមូលផលហើយក៏ដោយ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អ៊ុយក្រែន អះអាងថា រុស្ស៊ី ទើបតែប្រើមីស៊ីលជំនាន់ឆ្នាំ ៦០ ប៉ុណ្ណោះ