ក្រោយចេញពីអ៊ុយក្រែន ពេលនេះ លោក Biden ចាប់ផ្តើមបំពេញទស្សនកិច្ចនៅ ប៉ូឡូញ

ក្រោយចាកចេញពីប្រទេសអ៊ុយក្រែន ពេលនេះ ប្រធានាធិបតីអាមេរិក Joe Biden បានចាប់ផ្តើមដំណើរទស្សនកិច្ចរយៈពេលពីរថ្ងៃ នៅប្រទេសប៉ូឡូញ។

នេះជាដំណើរទស្សនកិច្ចលើកទី ២ របស់លោកទៅកានប្រទេសប៉ូឡូញក្នុងអំឡុងពេលមួយឆ្នាំ ខណៈលើកមុន មេដឹកនាំអាមេរិក បានធ្វើទស្សនកិច្ចសាធារណរដ្ឋមួយនេះ នៅខែមីនាឆ្នាំ ២០២២។

នៅថ្ងៃអង្គារទី២១ខែកុម្ភៈ តំណាង​របស់​ប្រធានាធិបតី​ប៉ូឡូញ​ ទទួល​បន្ទុក​កិច្ចការ​អន្តរជាតិ​លោក Marcin Przydacz បាន​និយាយ​ថា ដំណើរ​ទស្សន​កិច្ច​នេះនឹង​ត្រូវ​គ្រប​ដណ្តប់​ដោយ​ទិដ្ឋភាព​ទ្វេភាគី​នៃ​ទំនាក់​ទំនង​ប៉ូឡូញ-អាមេរិក។

នៅទីក្រុង វ៉ាសូវី លោក Biden នឹងជួបពិភាក្សាជាមួយសមភាគីប៉ូឡូញ លោក Andrzej Duda។ កាលពីសប្តាហ៍មុន អ្នកសម្របសម្រួលក្រុមប្រឹក្សាសន្តិសុខជាតិអាមេរិក សម្រាប់ទំនាក់ទំនងជាយុទ្ធសាស្ត្រ លោក John Kirby បាននិយាយថា លោក Biden មានបំណងបញ្ជាក់ជាថ្មី នូវការគាំទ្ររបស់សហរដ្ឋអាមេរិកចំពោះរដ្ឋនានារបស់អង្គការណាតូនៅអឺរ៉ុបខាងកើត និងលើកឡើងពីកិច្ចខិតខំប្រឹងប្រែងរួមគ្នាលើការគាំទ្រអ៊ុយក្រែន។

លោក Biden ក៏គ្រោងពិភាក្សាអំពីតួនាទីផ្នែកភស្តុភាររបស់ប៉ូឡូញ ក្នុងការផ្តល់ជំនួយផ្នែកយោធា និងមនុស្សធម៌ដល់អ៊ុយក្រែន មិនត្រឹមតែពីសហរដ្ឋអាមេរិកប៉ុណ្ណោះទេ ប៉ុន្តែក៏ពីសម្ព័ន្ធមិត្ត និងដៃគូរបស់ខ្លួនផងដែរ។ មេដឹកនាំ​ទាំង​ពីរ ​អាច​នឹង​ពិភាក្សា​អំពី​ការ​បង្កើនចំនួន​ទាហាន​អាមេរិក​នៅ​ក្នុង​ប្រទេស​ប៉ូឡូញទៀតផង៕

ប្រែសម្រួល៖ Vann Vann

ប្រភព៖ TASS

ចុចអាន៖ សាច់រឿង នៃដំណើរទស្សនកិច្ចសម្ងាត់បំផុតរបស់លោក Biden ទៅ អ៊ុយក្រែន