តើមូលនិធិរូបិយវត្ថុអន្តរជាតិ IMF និងធនាគារពិភពលោក World Bank ខុសគ្នាយ៉ាងណា?

មូលនិធិរូបិយវត្ថុអន្តរជាតិ (IMF) និងធនាគារពិភពលោក (WB) ត្រូវបានបង្កើតឡើងក្នុងខែកក្កដា ឆ្នាំ ១៩៤៤ ក្នុងសន្និសីទអន្តរជាតិមួយនៅទីក្រុង Bretton Woods រដ្ឋ New Hampshire សហរដ្ឋអាមេរិក ហើយវាជាក្របខ័ណ្ឌសម្រាប់កិច្ចសហប្រតិបត្តិការសេដ្ឋកិច្ចក្នុងគោលបំណងបង្កើតសេដ្ឋកិច្ចពិភពលោកដែលមានស្ថិរភាព និងវិបុលភាព ។

ខណៈពេលដែលគោលដៅនេះនៅតែជាចំណុចកណ្តាលសម្រាប់ស្ថាប័នទាំងពីរ ការងាររបស់ពួកគេមានការវិវឌ្ឍឥតឈប់ឈរ ដើម្បីឆ្លើយតបទៅនឹងការអភិវឌ្ឍន៍សេដ្ឋកិច្ច និងបញ្ហាប្រឈមនានា ។ ប៉ុន្តែទោះជាយ៉ាងណាក៏ដោយ បេសកម្មរបស់អង្គការទាំងពីរ គឺមិនដូចគ្នាឡើយ ។

មូលនិធិរូបិយវត្ថុអន្តរជាតិ (IMF) ផ្តោតទៅលើការលើកកម្ពស់ស្ថិរភាពម៉ាក្រូសេដ្ឋកិច្ច និងហិរញ្ញវត្ថុសកល ហើយផ្តល់ដំបូន្មានគោលនយោបាយ និងគាំទ្រការអភិវឌ្ឍសមត្ថភាព ដើម្បីជួយប្រទេសនានាក្នុងការកសាង និងរក្សាសេដ្ឋកិច្ចឲ្យរឹងមាំ ។

ទន្ទឹមនឹងនោះ IMF ផ្តល់ប្រាក់កម្ចីរយៈពេលខ្លី និងមធ្យម ដើម្បីជួយប្រទេសដែលកំពុងជួបប្រទះបញ្ហាតុល្យភាពនៃការទូទាត់ និងការលំបាកក្នុងការបំពេញកាតព្វកិច្ចទូទាត់អន្តរជាតិ ។ ប្រាក់កម្ចីរបស់ IMF ត្រូវបានផ្តល់មូលនិធិជាចម្បងដោយការរួមចំណែកកូតាពីសមាជិករបស់ខ្លួន ។ ជាពិសេស បុគ្គលិករបស់ IMF គឺជាសេដ្ឋវិទូដែលមានបទពិសោធន៍យ៉ាងទូលំទូលាយក្នុងគោលនយោបាយម៉ាក្រូសេដ្ឋកិច្ច និងហិរញ្ញវត្ថុ ហើយបច្ចុប្បន្ន IMF មានសមាជិកដល់​ ១៩០ ប្រទេស ។

ចំពោះធនាគារពិភពលោកវិញ មានតួនាទីជំរុញការអភិវឌ្ឍសេដ្ឋកិច្ចរយៈពេលវែង និងការកាត់បន្ថយភាពក្រីក្រ ដោយផ្តល់ការគាំទ្រផ្នែកបច្ចេកទេស និងហិរញ្ញវត្ថុ ដើម្បីជួយប្រទេសនានាអនុវត្តកំណែទម្រង់ ឬគម្រោងនានា ដូចជាការសាងសង់សាលារៀន ការផ្គត់ផ្គង់ទឹក និងអគ្គិសនី ការប្រយុទ្ធប្រឆាំងនឹងជំងឺ និងការការពារបរិស្ថានជាដើម ។

ជំនួយរបស់ធនាគារពិភពលោក ជាទូទៅមានរយៈពេលវែង ហើយត្រូវបានផ្តល់មូលនិធិដោយការរួមចំណែករបស់ប្រទេសសមាជិក និងតាមរយៈការចេញមូលបត្របំណុល ។ ចំណែកបុគ្គលិកធនាគារពិភពលោក គឺជាអ្នកឯកទេសលើបញ្ហាជាក់លាក់ ដូចជាអាកាសធាតុ ឬវិស័យផ្សេងៗដូចជាការអប់រំជាដើម ខណៈបច្ចុប្បន្ននេះ ធនាគារពិភពលោក មានសមាជិក ១៨៩​ ប្រទេស ៕

ប្រែសម្រួលដោយ ៖ នាង រតនៈ

ប្រភព ៖ IMF

ចុចអាន ៖ រុស្ស៊ី បញ្ជាក់ថា មិនចាំបាច់ខ្ចី ឬឱនក្បាលអង្វរសុំលុយពីបរទេសឡើយ