ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានថ្លែងក្នុងអំឡុងកិច្ចប្រជុំជាមួយលោក វ៉ាង យី អ្នកការទូតជាន់ខ្ពស់របស់ចិនកាលពីថ្ងៃពុធថា កិច្ចសហប្រតិបត្តិការរវាងទីក្រុងប៉េកាំង និងទីក្រុងមូស្គូ មានសារៈសំខាន់ណាស់ក្នុងការជួយឲ្យពិភពលោកមានស្ថេរភាព ។

ទន្ទឹមនោះ លោក វ៉ាង យី ក៏បានប្រាប់លោក ពូទីន វិញដែរថា “យើងបានត្រៀមខ្លួនជាស្រេចក្នុងការពង្រឹងភាពជាដៃគូយុទ្ធសាស្ត្រ និងកិច្ចសហប្រតិបត្តិការដ៏ស៊ីជម្រៅមួយនេះ” ។

ស្របពេលជាមួយគ្នានេះ អ្នកកាទូតកំពូលរបស់ចិន ក៏បានចុះហត្ថលេខាលើភាពជាដៃគូរវាងប្រទេសទាំងពីរផងដែរ ស្ដីពីការមិនដឹកនាំប្រឆាំងនឹងប្រទេសទីបីណាមួយ ជាពិសេសគឺមិនដាក់សម្ពាធលើបរទេសឡើយ ។

ទីក្រុងប៉េកាំងបានព្យាយាមប្រកាន់ជំហររបស់ខ្លួនជាភាគីអព្យាក្រឹត្យ ខណៈពេលដែលរក្សាទំនាក់ទំនងជិតស្និទ្ធជាមួយសម្ព័ន្ធមិត្តរបស់ខ្លួន ប៉ុន្តែទីក្រុងវ៉ាស៊ីនតោន និងអង្គការណាតូមានការព្រួយបារម្ភថា ប្រទេសចិនអាចនឹងបញ្ជូនអាវុធ និងគ្រាប់រំសេវ ដើម្បីជួយប្រទេសរុស្ស៊ីបន្តធ្វើប្រតិបត្តិការសឹកនៅអ៊ុយក្រែន ។

ប៉ុន្តែទោះជាយ៉ាងណា នៅពេលដែលកងកម្លាំងខាងក្រៅមួយចំនួនកំពុងឈ្លោះប្រកែកគ្នា អណ្តាតភ្លើងក៏បានឆាបឆេះឡើង ហើយការប្រឈមមុខដាក់គ្នានៅក្នុងតំបន់ ជាហេតុធ្វើឲ្យចំណងមិត្តភាព ចិន-រុស្ស៊ី ឈានដល់ “កម្រិតថ្មី” ។

គួរបញ្ជាក់ថា កិច្ចប្រជុំរបស់លោក ពូទីន និងលោក វ៉ាង យី បានកើតឡើង នៅពេលដែលប្រទេសចិនកំពុងព្យាយាមបង្ហាញថា ខ្លួនជាអ្នកសម្រុះសម្រួល ក៏ដូចជានឹងបង្ហាញដំណោះស្រាយនយោបាយចំពោះជម្លោះនៅអ៊ុយក្រែននៅសប្តាហ៍នេះ ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ រុស្ស៊ី បញ្ជូននាវាចម្បាំងផ្ទុកក្បាលគ្រាប់នុយក្លេអ៊ែរ ទៅធ្វើសមយុទ្ធជាមួយ ចិន