ប្រទេសអាល្លឺម៉ង់ អាចប្រឈមនឹងកង្វះខាតអគ្គិសនីប្រើប្រាស់ក្នុងរយៈពេល ២ ឆ្នាំខាងមុខ ដោយសារតែធនធានថាមពលមិនគ្រប់គ្រាន់ និងតម្រូវការកាន់តែកើនឡើង ។

យោងតាមការសិក្សាក្នុងស្រុកបង្ហាញថា ឆ្នាំ ​២០២៥ អាល្លឺម៉ង់ នឹងខ្វះថាមពលចំនួន ៤ ជីហ្គាវ៉ាត់ ខណៈដែលនៅឆ្នាំ ២០៣០ ការខ្វះខាតនេះនឹងកើនឡើងដល់ ៣០ ជីហ្គាវ៉ាត់ ។

ក្រុមអ្នកវិភាគអះអាងថា អាល្លឺម៉ង់ នឹងមិនអាចគ្របគ្រងតម្រូវការថាមពលជាមួយធនធានធម្មជាតិដែលកំពុងមាននោះទេ ហើយនៅឆ្នាំ ២០៣០ នឹងមានការដាច់ភ្លើង ១០០ ដង ដោយមានរយៈពេល​យូរបំផុត ២១ ម៉ោង ។

ទន្ទឹមនឹងនោះ អ្នកវិភាគបានលើកឡើងទៀតថា ទីក្រុងប៊ែរឡាំងនឹងមិនអាចបោះបង់ចោលឧស្ម័នក្នុងរយៈពេល ១០ ឆ្នាំខាងមុខទៀតឡើយ ព្រោះវាជាផ្នែកមួយដ៏សំខាន់សម្រាប់ផលិតថាមពល ដើម្បីកាត់បន្ថយការនាំចូល ។

ដូចគ្នានេះផងដែរ សារព័ត៌មាន Bloomberg បានបង្ហាញថា នៅឆ្នាំ ២០៣០ អាល្លឺម៉ង់នឹងត្រូវចំណាយយ៉ាងហោចណាស់ ១ ពាន់ពាន់លានដុល្លារ ដើម្បីបង្កើនផលិតកម្មថាមពលពីប្រភពកកើតឡើងវិញ ។

ជាមួយគ្នានោះ និយតករបណ្តាញអគ្គិសនីអាល្លឺម៉ង់ ក៏បានប៉ាន់ប្រមាណដែរថា អាល្លឺម៉ង់នឹងប្រឈមមុខការកើនឡើង​ ១ ភាគ ៣ នៃតម្រូវការនៅឆ្នាំ ២០៣០ ដែលមានន័យថា រោងចក្រថាមពល​ ត្រូវផលិតអគ្គិសនីបន្ថែមប្រហែល ២៥០ ជីហ្គាវ៉ាត់នៅឆ្នាំនោះ ៕

ប្រែសម្រួលដោយ ៖ នាង រតនៈ

ប្រភព ៖ RT

ចុចអាន ៖ អាល្លឺម៉ង់ បញ្ជាក់ថា ចិន សន្យាមិនផ្តល់សព្វាវុធឲ្យ រុស្ស៊ី