បញ្ហាកំហាប់ខ្យល់ពុលនៅបាងកក នឹងកាន់តែអាក្រក់ទៅៗ ក្នុងខែនេះ (មានវីដេអូ)

មជ្ឈមណ្ឌលកាត់បន្ថយការបំពុលខ្យល់របស់ប្រទេសថៃ (CAPM) កាលពីដើមសប្តាហ៍នេះបានបង្ហាញថា ការបំពុលដោយអ័ព្ទដែលប្រទេសប្រឈមមុខ ជាពិសេសនៅតំបន់ភាគខាងជើង នឹងកាន់តែអាក្រក់ទៅៗក្នុងខែមីនានេះ ខណៈទីក្រុងបាងកក និងខេត្តនៅជាប់នោះ នឹងជួបប្រទះកំហាប់ខ្យល់ពុល PM2.5 ក្នុងកម្រិតខ្ពស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

CAPM រាយការណ៍ថា គុណភាពខ្យល់នៅ២៥ទីតាំងទូទាំងប្រទេស គឺស្ថិតក្នុងកម្រិតមិនល្អ ដោយសារតែ PM2.5 បានកើនលើសកម្រិតសុវត្ថិភាព ៥០មីក្រូក្រាមក្នុងមួយម៉ែត្រគូប។

នៅទីក្រុងបាងកក និងតំបន់ជុំវិញនោះ កម្រិត PM2.5 គឺមានប្រហែល ២៧ ទៅ ៥៥មីក្រូក្រាមក្នុងមួយម៉ែត្រគូប។ ទន្ទឹមនោះ កម្រិត PM2.5 នៅភាគខាងជើង គឺប្រែប្រួលពី២៩ទៅ១០០មីក្រូក្រាមក្នុងមួយម៉ែត្រគូប ខណៈ២២ទីតាំង ប្រឈមនឹងកម្រិតមិនល្អ។ ចំណែកនៅតំបន់ភាគឦសាន កម្រិតគឺមានពី ២៤ទៅ ៥២មីក្រូក្រាមក្នុងមួយម៉ែត្រគូប។

ទោះបីជាយ៉ាងណាក៏ដោយ យោងតាមរបាយការណ៍របស់ CAPM, កម្រិត PM2.5 នៅតំបន់ភាគខាងកើត និងភាគខាងត្បូងប្រទេសថៃ គឺស្ថិតក្នុងកម្រិតមធ្យម។

នាយកដ្ឋានគ្រប់គ្រងការបំពុលព្យាករថា ការបំពុលដោយផ្សែងអ័ព្ទនៅទីក្រុងបាងកក និងទីក្រុងជាប់គ្នា ព្រមទាំងខេត្តភាគខាងជើងចំនួន ១៧ នឹងកាន់តែអាក្រក់ ក្នុងសប្តាហ៍ដំបូងនៃខែនេះ៕

សូមទស្សនាវីដេអូ៖

ប្រែសម្រួល៖​ Vann Vann

ប្រភព៖ Bangkok Post

ចុចអាន៖ ទីក្រុងបាងកក មើលលែងចង់ឃើញហើយ ដោយសារកំហាប់ខ្យល់ពុល