អាជ្ញាធរម៉ាឡេស៊ី ត្រូវបានគេស្នើឲ្យចាប់ផ្តើមប្រតិបត្តិការថ្មីមួយ ដើម្បីស្វែងរកជើងហោះហើរ MH370, ប្រាំបួនឆ្នាំបន្ទាប់ពីវាបាត់ខ្លួនពីរ៉ាដានៅលើសមុទ្រចិនខាងត្បូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្នើសុំនេះធ្វើឡើង បន្ទាប់ពីក្រុមហ៊ុនរ៉ូបូតសមុទ្រអាមេរិក Ocean Infinity អះអាងថា បានរកឃើញព័ស្តុតាងថ្មីនៃទីតាំងរបស់យន្តហោះ។

យន្តហោះ Boeing 777 កំពុងធ្វើដំណើរពីអាកាសយានដ្ឋានអន្តរជាតិ គួឡាឡាំពួ ទៅកាន់ទីក្រុងប៉េកាំង ជាមួយនឹងអ្នកដំណើរចំនួន២៣៩នាក់កាលពីថ្ងៃទី០៨ខែមីនា ឆ្នាំ២០១៤ នៅពេលវាបាត់ចេញពីរ៉ាដា ពោលគឺក្រោយចេញដំណើរបានជាងមួយម៉ោង។

អស់រយៈពេលបីឆ្នាំ ដែលម៉ាឡេស៊ី ចិន និងអូស្ត្រាលី បានស្វែងរកយន្តហោះនេះ នៅមហាសមុទ្រឥណ្ឌា ជាកន្លែងដែលគេជឿថាយន្តហោះធ្លាក់ ប៉ុន្តែមិនបានរកឃើញអ្វីទាល់តែសោះ។ ការស្វែងរកត្រូវបានលុបចោលជាផ្លូវការក្នុងខែមករាឆ្នាំ២០១៧ ដោយមិនមានការសន្និដ្ឋានអំពីអ្វីដែលអាចកើតឡើងចំពោះការហោះហើរដ៏អាថ៌កំបាំងនោះទេ។

ទោះបីជាយ៉ាងណាក៏ដោយ ថ្លែងទៅកាន់ Guardian ក្នុងថ្ងៃគម្រប់ខួបប្រាំបួនឆ្នាំនៃឧបទ្ទវហេតុនេះ លោក Oliver Plunkett នាយកប្រតិបត្តិក្រុមហ៊ុន Ocean Infinity និយាយថា បន្ទាប់ពីក្រុមហ៊ុនរបស់គាត់បានធ្វើការស្វែងរកមិនទទួលបានជោគជ័យនៅក្នុងឆ្នាំ២០១៨ ឥឡូវនេះខ្លួនទទួលបានព័ស្តុតាងថ្មី ដែលអាចនាំទៅដល់ការរកឃើញយន្តហោះ។

ថ្វីបើគាត់មិនបានចែករំលែកជាក់លាក់អំពីព័ស្តុតាងនេះក៏ដោយ ប៉ុន្តែលោក Plunkett និយាយថា គាត់សង្ឃឹមថានឹងបញ្ចុះបញ្ចូលរដ្ឋាភិបាលម៉ាឡេស៊ីក្នុងរយៈពេលប៉ុន្មានសប្តាហ៍ខាងមុខនេះ ឲ្យបើកភ្លើងខៀវដល់ការស្វែងរកមួយផ្សេងទៀត ហើយចាប់ផ្តើមនៅចុងឆ្នាំនេះ ឬនៅឆ្នាំ២០២៤។

ទន្ទឹមនឹងនេះ ភាពយន្តឯកសារថ្មីរបស់ Netflix ដែលមានចំណងជើងថា “MH370: The Plane That Disappeared” បានបង្កការចាប់អារម្មណ៍ជាសាធារណៈចំពោះអាថ៌កំបាំង និងបានបំភ្លឺអំពីទ្រឹស្តីថ្មីៗមួយចំនួន។

លោកស្រី Cyndi Hendry អ្នកស្រាវជ្រាវស្ម័គ្រចិត្តនៅក្រុមហ៊ុនរូបភាពផ្កាយរណប Tomnod បានប្រាប់ផលិតករ Netflix ថា លោកស្រីបានរកឃើញអ្វីដែលមើលទៅដូចជាបំណែកយន្តហោះនៅសមុទ្រចិនខាងត្បូង ត្រឹមតែប៉ុន្មានថ្ងៃប៉ុណ្ណោះបន្ទាប់ពីយន្តហោះបានបាត់ខ្លួន។

លោកស្រី Hendry អះអាងថា បានរកឃើញបំណែកយន្តហោះ ដែលដូចបេះបិទទៅនឹងជើងហោះហើរ MH370 នៅឯឆ្នេរសមុទ្រនៃប្រទេសវៀតណាម ជិតកន្លែងយន្តហោះបាត់ពីរ៉ាដា៕

ប្រែសម្រួល៖ Vann Vann

ប្រភព៖ RT

ចុចអាន៖ ឆោឡោ! អ្នកដំណើរម្នាក់ គំរាមសម្លាប់មនុស្សមួយយន្តហោះ