ធនាគារ HSBC ដែលមានមូលដ្ឋាននៅចក្រភពអង់គ្លេសប្រកាសថា បានទិញយកធនាគារ Silicon Valley UK ក្នុងតម្លៃត្រឹមតែ ១.២ ដុល្លារប៉ុណ្ណោះ បន្ទាប់ពីធនាគារនេះ​ក្ស័យធន ។

លោក Noel Quinn នាយកប្រតិបត្តិនៃធនាគារ HSBC បាននិយាយថា ការទិញយកនេះ គឺជាយុទ្ធសាស្ត្រដ៏ប្រសើរបំផុតសម្រាប់ប្រតិបត្តិការរបស់ HSBC នៅចក្រភពអង់គ្លេស ។

គិតត្រឹមថ្ងៃទី១០ ខែមីនា ប្រាក់កម្ចីនៃធនាគារ Silicon Valley នៅអង់គ្លេស មានចំនួន ៦.៦៨ ​ពាន់លានដុល្លារ ចំណែកប្រាក់បញ្ញើ​ក្នុងធនាគារនេះមានដល់ ៩.៤២ ពាន់លានដុល្លារ​ ។

ដោយឡែកកាល​ពី​ឆ្នាំ​មុន ធនាគារ Silicon Valley UK រកបានប្រាក់ចំណេញដល់ ១០៦.៩៥ លានដុល្លារនៅមុនពេល​បង់​ពន្ធរួច ។

គួរបញ្ជាក់ថា ធនាគារ Silicon Valley ដែលជាធនាគារធំលំដាប់ទី ១៦ នៅអាមេរិកបានប្រកាសបិទទ្វារក្ស័យធនកាលពីថ្ងៃទី១០ មីនា ដោយនៅចុងឆ្នាំ​ ២០២២ ធនាគារ​ Silicon Valley មានទ្រព្យសរុបប្រហែល ២០៩ ពាន់លានដុល្លារ ខណៈដែលប្រាក់បញ្ញើមានចំនួនជិត ១៧៥.៤ ពាន់លានដុល្លារ ៕

ប្រែសម្រួលដោយ ៖ នាង រតនៈ

ប្រភព ៖ Anadolu

ចុចអាន ៖ ធនាគារពាណិជ្ជធំមួយរបស់ អាមេរិក ប្រកាសក្ស័យធន