ដូណាល់ ត្រាំ ជឿថា សង្គ្រាមលោកលើកទី៣ នឹងផ្ទុះឡើង តែមានមនុស្សម្នាក់គត់ អាចរារាំងបាន

អតីតប្រធានាធិបតីអាមេរិកលោក ដូណាល់ ត្រាំ បានអួតអាងពីសមត្ថភាពរបស់គាត់ថា ជាបេក្ខជនប្រធានាធិបតីឆ្នាំ២០២៤តែម្នាក់គត់ ដែលអាចការពារសង្គ្រាមលោកលើកទី៣បាន។

លោក ត្រាំ បាននិយាយក្នុងយុទ្ធនាការឃោសនាបោះឆ្នោតនៅទីក្រុង Davenport នៃរដ្ឋ Iowa កាលពីថ្ងៃចន្ទទី១៣ខែមីនាថា “ខ្ញុំជាបេក្ខជនតែម្នាក់គត់ ដែលអាចធ្វើតាមការសន្យានេះបាន។ ខ្ញុំនឹងការពារសង្គ្រាមលោកលើកទី៣ ព្រោះខ្ញុំពិតជាជឿថា នឹងមានសង្គ្រាមលោកលើកទី៣”។

ក្នុងសុន្ទរកថាមុននេះ លោក ត្រាំ ក៏បាននិយាយដែរថា រដ្ឋបាលលោក ចូ បៃដិន និយាយមិនត្រូវទេ ហើយនឹងដឹកនាំប្រទេសឲ្យធ្លាក់ចូលទៅក្នុងសង្រ្គាមនុយក្លេអ៊ែរ ដែលអាចបញ្ចប់ពិភពលោក។

លោក ត្រាំ លើកឡើងថា “បើតាមការគ្រប់គ្រងសព្វថ្ងៃ យើងអាចធ្លាក់ចូលសង្គ្រាមលោកលើកទី៣ ព្រោះពួកគេនិយាយមិនត្រឹមត្រូវ។ ពួកគេមិនដឹងថា ពួកគេកំពុងធ្វើអ្វីនោះទេ។ យើងនឹងបញ្ចប់នៅក្នុងសង្គ្រាមលោក”។

លោក​​បន្ត​ថា “​វា​នឹង​ក្លាយ​ជា​សង្គ្រាម​នុយក្លេអ៊ែរ។ ដូច្នេះ វាមិនដូចសង្រ្គាមលោកលើកទី២ ដែលយើងមានតែរថក្រោះ និងកាំភ្លើង ហើយយើងដើរទៅរកគ្នានោះទេ។ នេះជាកម្រិតដែលអាចនឹងបញ្ចប់ពិភពលោកបាន ហើយយើងកំពុងមានមនុស្សដែលមិនដឹងថាពួកគេកំពុងធ្វើអ្វី”។

លោក ត្រាំ ក៏បានប្រាប់អ្នកគាំទ្រដែរថា ជ័យជម្នះរបស់គាត់នៅឆ្នាំ២០២៤ នឹងនាំទៅដល់ការបញ្ចប់ភ្លាមៗនៃសង្រ្គាមរុស្ស៊ី-អ៊ុយក្រែន ដែលបានអូសបន្លាយជាងមួយឆ្នាំមកហើយ ដោយគ្មានសញ្ញាថាមានកិច្ចព្រមព្រៀងសន្តិភាពណាមួយសោះ៕

ប្រែសម្រួល៖ Vann Vann

ប្រភព៖ Newsweek

ចុចអាន៖ លោក ត្រាំ ប្តឹងក្រសួងយុត្តិធម៌អាមេរិក ពាក់ព័ន្ធការឆែកឆេរនៅ Mar-a-Lago