ការសម្រេចជួយសង្គ្រោះដល់អ្នកបញើប្រាក់ក្នុងធនាគារ Silicon Valley ដែលទើបដួលរលំ ពីសំណាក់រដ្ឋភិបាលរបស់លោកប្រធានាធិបតី Joe Biden បានធ្វើឲ្យពាណិជ្ជ​ករជាមហាសេដ្ឋីអាមេរិកមួយចំនួនមិនពេញចិត្តឡើយ ។

លោក Ken Griffin ​ស្ថាបនិកនៃមូលនិធិការពារហានិភ័យ Citadel យល់ឃើញថា រដ្ឋាភិបាលអាមេរិកមិនគួរធ្វើអន្តរាគមន៍ដើម្បីការពារអ្នកដាក់ប្រាក់បញ្ញើទាំងអស់នៅធនាគារ Silicon Valley ក្នុងទីក្រុង Santa Clara រដ្ឋ California នោះទេ ។ អាមេរិក គឺជាប្រទេសមូលធននិយម ដូចនេះបើសិនជារដ្ឋាភិបាល​ចេញអន្តរាគមន៍បែបនេះ នោះជារឿងមិនសមស្របឡើយ ។

ទន្ទឹមនោះ លោកមហាសេដ្ឋីវិនិយោគទុន Cliff Asness សហស្ថាបនិកនៃក្រុមហ៊ុន AQR Capital Management LLC លើកឡើងថា ការជួយសង្គ្រោះនេះ គឺខុសទៅលើផ្នែកសីលធម៌ហិរញ្ញវត្ថុ ដែលហាក់បីដូចជាកាត់បន្ថយការ ពិចារណា​សម្រាប់អតិថិជន​ក្នុងការជ្រើសរើសធនាគារដែលមានសុវត្ថិភាពខ្ពស់ផ្សេងទៀត ។

​បន្ថែមពីនេះលោក Carson Block ដែលជាស្ថាបនិកក្រុមហ៊ុនពាណិជ្ជកម្ម Muddy Waters Capital បញ្ចេញមតិថា ការធានាសងប្រាក់ដល់អ្នកបញ្ញើវិញ ហាក់បីដូជាផ្តល់រង្វាន់ដល់អ្នកបរាជ័យក្នុងការគ្រប់គ្រងហានិភ័យហិរញ្ញវត្ថុ ។

គួរបញ្ជាក់ថា ធនាគារ Silicon Valley ដែលជាធនាគារធំលំដាប់ទី ១៦ នៅអាមេរិកបានប្រកាសបិទទ្វារក្ស័យធនកាលពីថ្ងៃទី១០ មីនា ដោយនៅចុងឆ្នាំ​ ២០២២ ធនាគារ​ Silicon Valley មានទ្រព្យសរុបប្រហែល ២០៩ ពាន់លានដុល្លារ ខណៈដែលប្រាក់បញ្ញើមានចំនួនជិត ១៧៥.៤ ពាន់លានដុល្លារ ហើយវាក៏ជាការបរាជ័យដ៏ធំបំផុតមួយផងដែររបស់ធនាគារអាមេរិក ចាប់តាំងពីវិបត្តិហិរញ្ញវត្ថុឆ្នាំ ២០០៨ មក ៕

ប្រែសម្រួលដោយ ៖ នាង រតនៈ

ប្រភព ៖ Yahoo

ចុចអាន ៖ ធនាគារ អង់គ្លេស ចាយលុយតែ ១ ដុល្លារទិញយកសាខាធនាគារដែល​ក្ស័យធនរបស់ អាមេរិក