ប្រធានាធិបតីបារាំងលោក Emmanuel Macron បានរំលងសភា ហើយអនុម័តកញ្ចប់កំណែទម្រង់សោធននិវត្តន៍ដ៏ចម្រូងចម្រាសមួយ ដែលបង្កឲ្យមានកុបកម្ម និងការដុតភ្លើងនៅតាមដងផ្លូវក្នុងទីក្រុងប៉ារីស។

កំណែទម្រង់ ដែលបង្កើនអាយុចូលនិវត្តន៍របស់ប្រទេសបារាំងដល់៦៤ឆ្នាំ បានបង្កឲ្យមានកូដកម្ម និងការតវ៉ាអស់រយៈពេលជាច្រើនខែរួចមកហើយ។

លោក Macron បានយកអំណាចរដ្ឋធម្មនុញ្ញពិសេសមួយដើម្បីអនុម័តច្បាប់នេះ ភ្លាមៗមុនពេលការបោះឆ្នោតមួយត្រូវបានកំណត់។

លោកស្រីនាយករដ្ឋមន្ត្រី Elisabeth Borne បានប្រកាសសេចក្តីសម្រេចនេះ នៅក្នុងរដ្ឋសភា ខណៈសមាជិកសភាបក្សប្រឆាំងបានស្រែកជេរ និងចំអកឡកឡាយ។

ក្រោមអំណាចដែលយកមកប្រើដោយលោក Macron និងលោកស្រី Borne, ច្បាប់នេះត្រូវបានចាត់ទុកថាអនុម័ត លុះត្រាតែសមាជិកសភាភាគច្រើនដាក់ញត្តិសម្តែងសេចក្តីមិនទុកចិត្តរដ្ឋាភិបាលក្នុងរយៈពេល២៤ម៉ោងបន្ទាប់។

ស្របពេលជាមួយគ្នានោះ មេដឹកនាំស្តាំនិយមលោកស្រី Marine Le Pen និយាយថា គណបក្ស National Rally របស់លោកស្រី នឹងគាំទ្រញត្តិនេះ ដូចមេដឹកនាំឆ្វេងនិយមមួយចំនួនដែរ។

លោក Macron បានត្អូញត្អែរច្រើនខែមកហើយថា ប្រព័ន្ធសោធននិវត្តន៍របស់ប្រទេសបារាំងនឹងក្ស័យធន លុះត្រាតែពលរដ្ឋដាក់ប្រាក់បន្ថែមទៅក្នុងប្រព័ន្ធ។ លោកបាននិយាយកាលពីខែមករាថា ការបង្កើនអាយុចូលនិវត្តន៍ពី៦២ដល់៦៤ឆ្នាំ នឹងក្លាយជាមធ្យោបាយត្រឹមត្រូវ និងមានទំនួលខុសត្រូវដើម្បីសម្រេចបាននូវបញ្ហានេះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ លោក Macron ព្រមានអំពីអនាគតរបស់ ទ្វីបអឺរ៉ុប