ត្រាំ ថាឲ្យ លោក បៃដិន កំពុងប្រែក្លាយ អាមេរិក ទៅជា “ប្រទេសចេក”

លោក ដូណាល់ ត្រាំ បានប្រាប់ក្រុមអ្នកគាំទ្រកាលពីពេលថ្មីៗនេះថា លោកប្រធានាធិបតី ចូ បៃដិន កំពុងប្រែក្លាយសហរដ្ឋអាមេរិកទៅជា “ប្រទេសចេក” ហើយលោកបានសន្យាថា នឹងលុបបំបាត់វណ្ណៈនយោបាយដែលគួរឲ្យស្អប់ខ្ពើមបែបនេះចេញ ប្រសិនបើជាប់ឆ្នោតម្តងទៀតនៅឆ្នាំក្រោយ ។

ថ្លែងទៅកាន់ហ្វូងមនុស្សនៅឯការប្រមូលផ្ដុំគ្នាលើកដំបូង មុនការបោះឆ្នោតឆ្នាំ ២០២៤ ក្នុងទីក្រុង Waco រដ្ឋតិចសាស់, លោក ត្រាំ បាននិយាយថា “ការប្រើអាវុធដើម្បីអនុវត្តច្បាប់របស់លោក បៃដិន ប្រឆាំងនឹងគូប្រជែង ជាពិសេសប្រឆាំងនឹងរុស្ស៊ី គឺកំពុងប្រែក្លាយអាមេរិកទៅជាប្រទេសចេក” ។

អតីតប្រធានាធិបតីអាមេរិករូបនេះបានប្រាប់ក្រុមអ្នកគាំទ្រទៀតថា “យុត្តិធម៌នឹងត្រូវបានធ្វើឡើង នៅពេលដែលយើងបានទម្លាក់វណ្ណៈនយោបាយដ៏គួរឲ្យស្អប់ខ្ពើមនេះចេញពីប្រទេសរបស់យើង” ។

លោក ត្រាំ ធ្លាប់បាន​អះអាង​ជា​ច្រើន​ខែកន្លងមក​ថា ប្រសិន​បើ​លោកជាប់​ឆ្នោត លោក​នឹង​អាច​សម្រេច​បាន​ការ​ដោះស្រាយ​ជម្លោះរុស្ស៊ី និងអ៊ុយក្រែនត្រឹមតែ​ក្នុង​រយៈពេល ២៤ ម៉ោងប៉ុណ្ណោះ ។

ពាក់ព័ន្ធនឹងបញ្ហានេះដែរ លោកមិនបានរៀបរាប់លម្អិតបន្ថែមទៀតអំពីយុទ្ធសាស្ត្របែបណា ដែលលោកនឹងសម្រេចបានសម្រាប់ដោះស្រាយនូវជម្លោះនេះនោះទេ ប៉ុន្តែបានស្តីបន្ទោសទៅកាន់អ្នកពាក់ព័ន្ធទាំងអស់របស់អាមេរិក ទាំងនៅក្នុងមន្ទីរបញ្ចកោណ ក្រសួងការបរទេស និងផ្នែកផ្សេងទៀតនៅក្នុងក្រសួងសន្តិសុខជាតិ ។

គួរបញ្ជាក់ថា បច្ចុប្បន្នលោក ត្រាំ កំពុងនាំមុខគេក្នុងការស្ទង់មតិ ដើម្បីឈានទៅដល់ការតែងតាំងជាប្រធានគណបក្សសាធារណដ្ឋសម្រាប់ឈរឈ្មោះជាបេក្ខភាពប្រធានាធិបតីក្នុងការបោះឆ្នោតនៅឆ្នាំ ២០២៤ ខណៈអភិបាលរដ្ឋ Florida គឺលោក រ៉ុន ដឺសាន់ទីស (Ron DeSantis) ស្ថិតនៅលំដាប់ទី ២ ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ ស្ងាត់ៗ យោធា មីយ៉ាន់ម៉ា ត្រៀមធ្វើព្យុហយាត្រាទ្រង់ទ្រាយធំនៅថ្ងៃនេះ