យោធាដែលកំពុងកាន់អំណាចរបស់ប្រទេសមីយ៉ាន់ម៉ា ទំនងជានឹងធ្វើព្យុហយាត្រាដ៏ធំមួយនៅក្នុងរដ្ឋធានីណៃពិដោរ នៅថ្ងៃចន្ទនេះ ដើម្បីប្រារព្ធទិវាកងកម្លាំងប្រដាប់អាវុធ ។

ជារៀងរាល់ឆ្នាំ យោធាតែងតែធ្វើព្យុហយាត្រានៅចំថ្ងៃដែលការប្រយុទ្ធទាមទារឯករាជ្យបានចាប់ផ្ដើមនៅឆ្នាំ ១៩៤៥ អំឡុងពេលសង្គ្រាមប៉ាស៊ីហ្វិកប្រឆាំងនឹងយោធាអធិរាជជប៉ុន ។

ទន្ទឹមនោះ យោធាត្រូវបានគេរំពឹងថា នឹងបង្ហាញពីអំណាចរបស់ខ្លួននៅក្នុងក្បួនដង្ហែដែលមានការចូលរួមពីទាហានមួយចំនួនធំ ក៏ដូចជាយន្តហោះចម្បាំង ខណៈឧត្តមសេនីយកំពូលរបស់ប្រទេស គឺលោក មីន អ៊ុងឡាំង (Min Aung Hlaing) ក៏នឹងមានវត្តមានក្នុងព្យុហយាត្រានោះផងដែរ ។

ស្របពេលជាមួយគ្នានេះ យោធាក៏កំពុងបង្កើនការវាយលុករបស់ខ្លួនប្រឆាំងនឹងកងកម្លាំងប្រដាប់អាវុធគាំទ្រលទ្ធិប្រជាធិបតេយ្យ និងក្រុមជនជាតិភាគតិចនៅក្នុងតំបន់សាហ្គាង (Sagaing) ភាគពាយ័ព្យនៃប្រទេសមីយ៉ាន់ម៉ា និងនៅក្នុងរដ្ឋ កាយ៉ា (Kayah) ភាគខាងកើតរបស់ប្រទេសផងដែរ ។

ពាក់ព័ន្ធនឹងបញ្ហានេះដែរ ក្រុមសិទ្ធិមនុស្សក្នុងស្រុកនិយាយថា មនុស្ស ៣,១៦០ នាក់ត្រូវបានសម្លាប់នៅក្នុងការប្រយុទ្ធគ្នា ចាប់តាំងពីរដ្ឋប្រហារយោធាឆ្នាំ ២០២១ ។

ក្រោយមកសហរដ្ឋអាមេរិក អង់គ្លេស និងប្រទេសមួយចំនួនទៀត បានដាក់ទណ្ឌកម្មលើបុគ្គល និងអង្គការនានា ដែលជាប់ពាក់ព័ន្ធជាមួយមេដឹកនាំយោធាមីយ៉ាន់ម៉ា ដោយអំពាវនាវឲ្យបញ្ចប់អំពើហិង្សាជាបន្ទាន់ ប៉ុន្តែ​ទោះជាយ៉ាងណា មិន​មានសញ្ញាបញ្ចប់ណាមួយ​​ក្នុង​ការ​ប្រយុទ្ធ​គ្នា​នេះនោះទេ ពោលចំនួន​ជន​រងគ្រោះ​នៅ​តែ​បន្ត​កើន​ឡើងដដែល ៕

ប្រែសម្រួលដោយ ៖ ជីវ័ន្ត

ប្រភព ៖ NHK