ឯកអគ្គរដ្ឋទូតរុស្ស៊ីប្រចាំទីក្រុង ស្តុកខុល បានព្រមានថា ប្រសិនបើប្រទេសស៊ុយអែត ចូលរួមជាមួយអង្គការណាតូមែននោះ ប្រជាជនស៊ុយអែតនឹងត្រូវបញ្ជូនទៅស្លាប់។

លោក Viktor Tatarintsev បានអះអាងនៅក្នុងសេចក្តីថ្លែងការណ៍មួយលើគេហទំព័ររបស់ស្ថានទូតរុស្ស៊ីថា ស៊ុយអែត និងប្រទេសជិតខាងគឺហ្វាំងឡង់ សុទ្ធតែប្រឈមមុខនឹងវិធានការសងសឹករួមទាំង វិធានការផ្នែកយោធាផងដែរ ប្រសិនបើពួកគេចូលរួមជាមួយសម្ព័ន្ធភាពយោធាអន្តរជាតិ។

លោក Tatarintsev និយាយថា ប្រទេសស៊ុយអែតកំពុងបោះជំហានចូលទៅក្នុងជ្រោះជ្រៅបំផុត ដោយសារតែសមាជិកភាពអង្គការណាតូ ហើយប្រជាជនស៊ុយអែត នឹងត្រូវអូសទាញចូល និងបញ្ជូនទៅស្លាប់ ដើម្បីផលប្រយោជន៍អ្នកដទៃ។

ក្រោយការព្រមាននេះ ស៊ុយអែត បានកោះហៅឯកអគ្គរដ្ឋទូតរុស្សីមកបកស្រាយអំពីសុន្ទរកថា ដែលក្នុងនោះ លោកក៏និយាយដែរថា ប្រទេសស៊ុយអែតនិងហ្វាំងឡង់ នឹងក្លាយជាគោលដៅស្របច្បាប់ បន្ទាប់ពីចូលរួមជាមួយអង្គការណាតូ។

ប្រទេសនៅតំបន់ Nordic ទាំងពីរ បានស្វែងរកសមាជិកភាពណាតូ ភ្លាមៗបន្ទាប់ពីការលុកលុយរបស់រុស្ស៊ីលើអ៊ុយក្រែនកាលពីឆ្នាំមុន។

យ៉ាងណាក្តី ការគំរាមកំហែងប្រឆាំងស៊ុយអែតនិងហ្វាំងឡង់ ត្រូវបានគេមើលឃើញថា ជាការប៉ុនប៉ងចុងក្រោយបង្អស់របស់រុស្ស៊ី ដើម្បីបង្ហាញសាច់ដុំទៅប្រទេសលោកខាងលិច ខណៈមានសេចក្តីរាយការណ៍ថា វិមានក្រឹមឡាំងកំពុងរៀបចំធ្វើសមយុទ្ធមីស៊ីលនុយក្លេអ៊ែរទ្រង់ទ្រាយធំ។

គួរបញ្ជាក់ថា ទាំងប្រទេសស៊ុយអែត និងហ្វាំងឡង់ មានសម្ព័ន្ធភាពជិតស្និទ្ធជាមួយអង្គការណាតូ អស់រយៈពេលជាច្រើនទសវត្សរ៍មកហើយ ប៉ុន្តែមតិសាធារណៈ ក្នុងប្រទេសទាំង២ បានប្រឆាំងនឹងការចូលរួមក្នុងសម្ព័ន្ធភាពជាផ្លូវការ មុនការវាយលុករបស់រុស្ស៊ី។

ទោះបីជាយ៉ាងណាក៏ដោយ ការស្ទង់មតិមួយចំនួនបានលើកឡើងថា ៨០%នៅក្នុងប្រទេសហ្វាំងឡង់ និងជាង២ភាគ៣នៅក្នុងប្រទេសស៊ុយអែត ឥឡូវនេះ​ ពេញចិត្តក្នុងការចូលរួមជាមួយណាតូ ចំពេលមានសង្រ្គាមនៅអ៊ុយក្រែន៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ រុស្ស៊ី ប្រកាសឲ្យរង្វាន់កងទ័ព បើវាយចូលទឹកដីអ៊ុយក្រែនមួយគីឡូម៉ែត្រ បានប្រាក់បន្ថែមជាង ៦០០ដុល្លារ