រដ្ឋមន្ត្រីការបរទេសអាមេរិក នឹងធ្វើទស្សនកិច្ចវៀតណាម ចំពេលស្ថានការណ៍នៅ អាស៊ី កំពុងតានតឹង 

ក្រសួងការបរទេសអាមេរិក បានឲ្យដឹងកាលពីថ្ងៃចន្ទទី១០ខែមេសាថា រដ្ឋមន្ត្រីការបរទេសលោក Antony Blinken នឹងធ្វើទស្សនកិច្ចប្រទេសវៀតណាមនៅចុងសប្តាហ៍នេះ ក្នុងគោលបំណងកសាងទំនាក់ទំនងជាមួយដៃគូរអាមេរិក ខណៈដែលភាពតានតឹង កំពុងឡើងកម្តៅខ្ពស់ជាមួយប្រទេសចិន ជុំវិញបញ្ហាកោះតៃវ៉ាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Blinken នឹងចូលបំពេញទស្សនកិច្ចនៅទីក្រុងហាណូយ ខណៈពេលលោកធ្វើដំណើរឆ្ពោះទៅកាន់កិច្ចប្រជុំក្រុមរដ្ឋមន្ត្រីការបរទេស G7 នាចុងសប្តាហ៍នេះ នៅរមណីយដ្ឋានភ្នំ Karuizawa របស់ប្រទេសជប៉ុន។

យោងតាមសេចក្តីថ្លែងការណ៍របស់ក្រសួងការបរទេស, លោក Blinken នឹងពិភាក្សាអំពីចក្ខុវិស័យរួមនៃទំនាក់ទំនង វិបុលភាព និងសន្តិភាពក្នុងតំបន់ឥណ្ឌូប៉ាស៊ីហ្វិក។

សហរដ្ឋអាមេរិក មានទំនាក់ទំនងល្អប្រសើរជាមួយវៀតណាម រួមទាំងវិស័យការពារជាតិផងដែរ ដោយប្រទេសទាំងពីរបានឈានដល់ការផ្សះផ្សាគ្នា ថ្វីបើធ្លាប់មានសង្គ្រាមដ៏ជូរចត់ក៏ដោយ។ ទន្ទឹមនេះ វៀតណាម ក៏មានភាពតានតឹងយូរអង្វែងជាមួយចិនផងដែរ។

គួរបញ្ជាក់ថា នេះនឹងក្លាយជាដំណើរទស្សនកិច្ចលើកដំបូងរបស់លោក Blinken ទៅកាន់ប្រទេសវៀតណាម ចាប់តាំងពីក្លាយជារដ្ឋមន្ត្រីការបរទេស៕

ប្រែសម្រួល៖ Vann Vann

ប្រភព៖ CNA

ចុចអាន៖ នាវាពិឃាដអាមេរិក ចូលជិតកោះគ្រប់គ្រងដោយចិន ចំពេលតៃវ៉ាន់ ត្រូវឡោមព័ទ្ធដោយសមយុទ្ធ