អ្នកជំនាញព្រមានថា ថៃ នឹងរងគ្រោះដោយអាកាសធាតុកាន់តែក្តៅខ្លាំង

អ្នកជំនាញអាកាសធាតុ ព្រមានថា គំរូអាកាសធាតុ El Nino នឹងនាំមកនូវអាកាសធាតុកាន់តែក្តៅ និងកាន់តែស្ងួតនៅទូទាំងប្រទេសថៃ ក្នុងរយៈពេលប៉ុន្មានខែខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់ប្រទេសថៃ, រលកកម្តៅក្នុងរដូវក្តៅនេះ មានកម្រិតខ្លាំងជាងការរំពឹងទុក ដែលកាលពីថ្ងៃសៅរ៍ទី១៥ខែមេសា នៅខេត្ត Tak បានបង្កើតកំណត់ត្រាសីតុណ្ហភាពថ្មី ពោលគឺឈានដល់ ៤៥.៤អង្សាសេ ដោយបំបែកកំណត់ត្រាចាស់ ៤៤.៦អង្សាសេក្នុងខេត្ត Mae Hong Son កាលពីថ្ងៃទី២៨ខែមេសាឆ្នាំ២០១៦។

ហេតុនេះ អ្នកជំនាញបានអំពាវនាវឲ្យអាជ្ញាធរថៃ ឆ្លើយតបជាបន្ទាន់ចំពោះបញ្ហានេះ ព្រោះជាង៨០%នៃចំនួនប្រជាជន បានរងផលប៉ះពាល់រួចទៅហើយ ដោយសារការកើនឡើងការគំរាមកំហែងសុខភាពពីអាកាសធាតុក្តៅខ្លាំងដែលមិនអាចទ្រាំទ្របាន និងកង្វះទឹកប្រើប្រាស់។

អ្នកជំនាញសេដ្ឋកិច្ចកសិកម្ម និងបម្រែបម្រួលអាកាសធាតុនៅនាយកដ្ឋានសេដ្ឋកិច្ចនៃសាកលវិទ្យាល័យ Kasetsart សាស្ត្រាចារ្យ Witsanu Attavanich បាននិយាយថា សាធារណជន ត្រូវតែត្រៀមលក្ខណៈសម្រាប់គ្រោះរាំងស្ងួត និងកម្តៅខ្លាំងពេញមួយឆ្នាំ។ អ្វីដែលប្រទេសនេះកំពុងជួបប្រទះ គឺដោយសារតែបម្រែបម្រួលអាកាសធាតុ បណ្ដាលមកពីមនុស្ស។

លោកនិយាយទៀតថា ផលប៉ះពាល់នៃការបំភាយឧស្ម័នផ្ទះកញ្ចក់ពីសកម្មភាពរបស់មនុស្ស បាននិងកំពុងធ្វើឲ្យសីតុណ្ហភាពមធ្យមពិភពលោក កើនឡើងបន្តិចម្តងៗ។

ថ្វីបើជាធម្មតា កម្តៅរដូវក្តៅក្នុងប្រទេសថៃ ត្រូវថយចុះដោយសារតែកម្រិតភ្លៀងធ្លាក់ពេលរដូវមូសុងចូលមកដល់នៅពាក់កណ្តាលខែឧសភាក៏ដោយ ប៉ុន្តែលោកអះអាងថា កម្តៅខ្លាំងនៅឆ្នាំនេះ នឹងបន្តសូម្បីតែក្រោយចប់រដូវក្តៅក៏ដោយ ព្រោះតែឥទ្ធិពលកម្តៅនៃបាតុភូត El Nino ដែលកំពុងវិវត្ត៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ថៃ ប្រឈមការវាយប្រហារដោយខ្យល់ព្យុះ អំឡុងពិធីបុណ្យសង្ក្រាន្ត