រុស្ស៊ី ថា មិនខ្វះទេអាវុធសម្រាប់ប្រយុទ្ធនៅ អ៊ុយក្រែន

រដ្ឋមន្ត្រីក្រសួងការពារជាតិរុស្ស៊ីលោក Sergei Shoigu បានប្រាប់យោធាកំពូលរបស់គាត់កាលពីថ្ងៃអង្គារថា កងកម្លាំងរបស់រុស្ស៊ីមានអាវុធគ្រប់គ្រាន់ដើម្បីកម្ទេចសត្រូវនៅអ៊ុយក្រែន ។

លោក Shoigu បាននិយាយទៀតថា “ទោះយ៉ាងណា យើងត្រូវតែបង្កើនការផលិតអាវុធដែលមានសមត្ថភាពខ្លាំងទ្វេដងឲ្យបានឆាប់រហ័សផងដែរ ដើម្បីបន្ថែមការផ្គត់ផ្គង់ទៅដល់កងកម្លាំងរុស្ស៊ីដែលកំពុងឈរជើងប្រយុទ្ធក្នុងសមរភូមិជួរមុខនៅអ៊ុយក្រែនដើម្បីឆាប់ទទួលបានជ័យជម្នះ” ។

ទន្ទឹមនោះ មន្ត្រីការពារជាតិរុស្ស៊ីរូបនេះក៏បានធានាដល់មេបញ្ជាការដែលកំពុងឈរជើងនៅជួរមុខក្នុងប្រទេសអ៊ុយក្រែនផងដែរថា ពួកគេនឹងផ្តល់គ្រាប់បន្ថែមទៀតដល់កងកម្លាំងដើម្បីប្រយុទ្ធ បន្ទាប់ពីអ្នក​ខ្លះ​បាន​ត្អូញត្អែរ​ពី​កង្វះខាត ហើយ​គំរាម​ដក​ខ្លួន​ចេញពីសមរភូមិ ។

បច្ចុប្បន្នទាហានស៊ីឈ្នួល Wagner Group កំពុងជួយប្រយុទ្ធជាមួយទាហានរុស្ស៊ីដើម្បីដណ្ដើមយកទីក្រុង Bakhmut ភាគខាងកើតរបស់អ៊ុយក្រែន ប៉ុន្តែទោះជាយ៉ាងណាលោក Yevgeny Prigozhin ប្រធានក្រុមទាហានស៊ីឈ្នួលបានព្រមានកាលពីពេលថ្មីៗនេះថា ប្រសិនបើពួកគេមិនទទួលបានការផ្គត់ផ្គង់តាមដែលពួកគេត្រូវការទេ នោះខ្សែត្រៀមជួរមុខអាចនឹងបរាជ័យ ។

គួរបញ្ជាក់ថា ការលើកឡើងរបស់រដ្ឋមន្ត្រីការពារជាតិរុស្ស៊ីរូបនេះបានកើតឡើង បន្ទាប់ពីប្រធានាធិបតីអ៊ុយក្រែនលោក Volodymyr Zelensky អះអាងពីការចាប់ផ្ដើមបើកការវាយលុកទ្រង់ទ្រាយធំ ដើម្បីដណ្ដើមយកទឹកដីរបស់ខ្លួនពីប្រទេសរុស្ស៊ីមកវិញក្នុងពេលឆាប់ៗខាងមុខនេះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក ហ្សេលេនស្គី ថា ឆាប់ៗនេះ អ៊ុយក្រែន នឹងបើកការវាយលុកដើម្បី​ដណ្ដើមទឹកដីពី រុស្ស៊ី មកវិញ