ប៉ូឡូញ ប្រយ័ត្នខ្លាំង បន្ទាប់ពីប្រទះឃើញ បាឡុង ហោះ ក្នុងដែនអាកាសរបស់ខ្លួន

ប្រទេសប៉ូឡូញ កំពុងប្រុងប្រយ័ត្នខ្ពស់ បន្ទាប់ពីកងកម្លាំងប្រដាប់អាវុធ បានរកឃើញបាឡុងដែលសង្ស័យថាហោះឈ្លបយកការណ៍ នៅក្នុងដែនអាកាសរបស់ខ្លួន ហើយជឿថា បាឡុងនេះ គឺហោះចេញពីប្រទេសបេឡារុស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីការពារជាតិប៉ូឡូញ បានចែករំលែកនៅលើ Twitter ថា បាឡុងនេះ ត្រូវបានគេប្រទះឃើញនៅម៉ោងប្រហែល ៨ និង ៣០ នាទីយប់ថ្ងៃសុក្រទី១២ខែឧសភា (ពេលវេលានៅប៉ូឡូញ) ហើយក្រុមមន្ត្រីកំពុងធ្វើការត្រួតពិនិត្យយ៉ាងហ្មត់ចត់ជាទីបំផុត។

ទោះបីជាយ៉ាងណាក៏ដោយ បាឡុងបានបាត់ពីរ៉ាដានៅម៉ោងប្រហែល១២:៣០ រំលងអធ្រាត្រឈានចូលថ្ងៃសៅរ៍ នៅជិតទីក្រុង Rypin កណ្តាលប្រទេសប៉ូឡូញ ចម្ងាយប្រហែល ២៩០គីឡូម៉ែត្រ ពីព្រំដែនប៉ូឡូញ ជាប់បេឡារុស។

គួរបញ្ជាក់ថា រឿងនេះ កើតឡើងបន្ទាប់ពីដែនអាកាសរបស់ប៉ូឡូញ ជួបការបំពានពីរដងរួចមកហើយ ចាប់តាំងពីរុស្ស៊ី បើកការវាយលុកប្រទេសអ៊ុយក្រែន កាលពីខែកុម្ភៈឆ្នាំមុន។

ក្នុងខែ​វិច្ឆិកាឆ្នាំ​២០២២ បុរស​ប៉ូឡូញ​ពីរ​នាក់​បាន​ស្លាប់ ​ពេលដែល​មីស៊ីល​ធ្លាក់​នៅ​ភាគ​ខាង​កើតប្រទេស។ ហើយក្នុងខែធ្នូ វត្ថុមួយទៀតបានធ្លាក់លើទឹកដីប៉ូឡូញ ប៉ុន្តែទើបត្រូវបានប្រជាជនប៉ូឡូញ រកឃើញនៅក្នុងព្រៃ កាលពីខែមុនប៉ុណ្ណោះ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ចិន ថា អាមេរិក ប្រតិកម្មជ្រុលហួសហេតុ និងធ្វើឲ្យខូចទំនាក់ទំនង ដោយសាររឿង បាឡុង