ព័ត៌មានអន្ដរជាតិ

តើលោក ប្រាយុទ្ធ និយាយផ្ដាំផ្ញើអ្វីខ្លះ បន្ទាប់ពីចាញ់ឆ្នោត?

បានផុស

២ years មុន

នៅ

ថ្ងៃពុធ ១៧ ឧសភា ២០២៣

ដោយ

លោក ប្រាយុទ្ធ ចាន់អូចា ហាក់ស្ងប់ស្ងាត់ និងមិនមានប្រតិកម្មអ្វីគួរឲ្យកត់សម្គាល់នោះទេ បន្ទាប់ពីរងបរាជ័យយ៉ាងចាស់ដៃក្នុងការបោះឆ្នោតសកលកាលពីថ្ងៃទី១៤ ខែឧសភា ក្រោមកណ្ដាប់ដៃរបស់គណបក្សចលនាឆ្ពោះទៅមុខ (MFP) ខណៈកន្លងមកលោកក៏ធ្លាប់លើកឡើងផងដែរថា លោកទទួលស្គាល់ និងគោរពលទ្ធផលបោះឆ្នោត ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ុន្តែទោះជាយ៉ាងណា នាយករដ្ឋមន្ត្រីថៃដែលផុតអាណត្តិរូបនេះក៏បានចេញមកនិយាយផ្ដាំផ្ញើ ជាពិសេសលោកបានថ្លែងអំណរគុណដល់អ្នកបោះឆ្នោតគាំទ្រលោក និងបានអបអរសាទរដល់គណបក្សដែលឈ្នះឆ្នោតទាំងអស់ផងដែរ ។

លោក ប្រាយុទ្ធ បាននិយាយថា “ការបោះឆ្នោតបានបញ្ចប់ទៅហើយ ហើយក៏សូមអរគុណចំពោះការបោះឆ្នោតរបស់ប្រជាពលរដ្ឋផងដែរ ហើយខ្ញុំសូមអបអរសាទរដល់គណបក្សទាំងអស់ដែលទទួលបានសំឡេងឆ្នោតពីប្រជាពលរដ្ឋ” ។

លោកឧត្តមសេនីយ៍រូបនេះបានបន្ថែមទៀតថា “ចាប់ពីពេលនេះទៅ វាគឺជាការផ្លាស់ប្តូរ និងការបង្កើតរដ្ឋាភិបាលថ្មី ។ ប្រជាជនថៃទាំងអស់ត្រូវចេះស្រឡាញ់គ្នា និងរួបរួមគ្នាដើម្បីប្រទេសជាតិ កុំបង្កជម្លោះ រួមគ្នាអភិវឌ្ឍប្រទេស ដើម្បីរក្សាបានភាពរីកចម្រើន និងនិរន្តរភាពក្នុងការអភិវឌ្ឍន៍ប្រទេសជាតិទាំងនៅពេលនេះ និងពេលអនាគត” ។

គួរបញ្ជាក់ថា គណបក្សថៃរួបរួមជាតិ (UNT) របស់លោក ប្រាយុទ្ធ មិនទទួលបានអាសនៈសភាច្រើនដូចការរំពឹងទុកនោះទេ ពោលគណបក្សមួយនេះបានត្រឹមតែ ៣៦ អាសនៈប៉ុណ្ណោះក្នុងចំណោមអាសនៈសភាចំនួន ៥០០ អាសនៈ ខណៈបក្សចលនាឆ្ពោះទៅមុខ របស់បេក្ខជននាយករដ្ឋមន្ត្រីថ្មីគឺលោក ភីថា លីមចារើនរ៉ាត់ ទទួលបានរហូតដល់ ១៥១ អាសនៈ តាមពីក្រោយដោយគណបក្សភឿថៃរបស់កូនស្រីលោក ថាក់ស៊ីន ដែលទទួលបានចំនួន ១៤១ អាសនៈ ៕