អាមេរិក និងណាតូ កំពុងព្យាយាមបង្វែរតំបន់អាស៊ីកណ្ដាល ទៅជាទីតាំង​ឈរជើងដើម្បីគំរាមកំហែង រុស្ស៊ី

អនុរដ្ឋមន្ត្រីការបរទេសរុស្ស៊ី លោក Mikhail Galuzin បាននិយាយកាលពីថ្ងៃអង្គារថា សហរដ្ឋអាមេរិក និងអង្គការណាតូ កំពុងព្យាយាមប្រែក្លាយតំបន់អាស៊ីកណ្តាល ទៅជាទីតាំងឈរជើងសម្រាប់ការគំរាមកំហែងដល់ព្រំដែនភាគខាងត្បូងរបស់រុស្ស៊ី ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកការទូតរូបនេះបាននិយាយថា សហរដ្ឋអាមេរិក និងអង្គការណាតូកំពុងព្យាយាមចូលរួមជាមួយបណ្តាប្រទេសអាស៊ីកណ្តាលនៅក្នុងកម្មវិធីភាពជាដៃគូ និងហ្វឹកហ្វឺនដើម្បីបន្តធ្វើសមយុទ្ធរួមគ្នានៅក្នុងតំបន់ ក៏ដូចជាការដាក់ពង្រាយហេដ្ឋារចនាសម្ព័ន្ធយោធារបស់ពួកគេជាដើម ។

លោក Galuzin បាននិយាយនៅឯកិច្ចពិភាក្សា Valdai Discussion Club ថា “កិច្ចខិតខំប្រឹងប្រែងទាំងនេះច្បាស់ជាមានគោលបំណងក្នុងការទប់ស្កាត់ប្រទេសរុស្ស៊ី ដោយបំបែកតំបន់ភាគច្រើនចេញពីប្រទេសរបស់យើង ហើយប្រែក្លាយវាបន្តិចម្តងៗទៅជាទីកន្លែងសម្រាប់ការគំរាមកំហែងដល់ព្រំដែនភាគខាងត្បូងរបស់យើង” ។

ទោះជាយ៉ាងណាក៏ដោយ ជាការឆ្លើយតប រុស្ស៊ីក៏ត្រៀមនឹងដាក់ពង្រាយអាវុធនៅគ្រប់ទីកន្លែងលើទឹកដីរបស់ខ្លួនតាមដែលចិត្តចង់ ក៏ដូចជាបង្កើនការផលិតអាវុធផងដែរ បន្ទាប់ពីដកខ្លួនចេញពីសន្ធិសញ្ញាគ្រប់គ្រងអាវុធរបស់អឺរ៉ុប (CFE) ជាមួយអង្គការណាតូ ។

គួរបញ្ជាក់ថា ប្រទេសរុស្ស៊ីបានផ្អាកការចូលរួមក្នុងសន្ធិសញ្ញា CFE កាលពីឆ្នាំ ២០០៧ ដោយចោទប្រកាន់អង្គការណាតូ រំលោភលើបទប្បញ្ញត្តិនៃសន្ធិសញ្ញានេះម្តងហើយម្តងទៀត និងបានលើកឡើងពីការបដិសេធរបស់ប្លុកដែលដឹកនាំដោយសហរដ្ឋអាមេរិកមួយនេះ ក្នុងការផ្តល់សច្ចាប័នលើកំណែថ្មីនៃកិច្ចព្រមព្រៀង ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ រុស្ស៊ី ចង់ដាក់អាវុធនៅកន្លែងណាក៏បាន លើដីរបស់ខ្លួន ក្រោយចាកចេញពីសន្ធិសញ្ញា ជាមួយណាតូ