រុស្ស៊ី ថា ទាំងទីក្រុង Hiroshima និង Bakhmut  សុទ្ធតែ អាមេរិក ជាអ្នក​បំផ្លាញ

អ្នកនាំពាក្យក្រសួងការបរទេសរុស្សីលោកស្រី Maria Zakharova បានចង្អុលបង្ហាញថា ទាំងទីក្រុង Bakhmut របស់អ៊ុយក្រែន និងទីក្រុង Hiroshima របស់ជប៉ុន គឺសុទ្ធតែត្រូវបានបំផ្លាញដោយសហរដ្ឋអាមេរិក ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអះអាងរបស់អ្នកនាំពាក្យក្រសួងការបរទេសរុស្ស៊ីរូបនេះ គឺជាការឆ្លើយតបទៅនឹងការអត្ថាធិប្បាយប្រៀបធៀបរបស់លោកប្រធានាធិបតីអ៊ុយក្រែន Volodymyr Zelensky អំពីការទម្លាក់គ្រាប់បែកបរមាណូលើទីក្រុង Hiroshima ទៅនឹងអរិភាពនៅក្នុងទីក្រុង Bakhmut ដែលរុស្ស៊ីទើបតែប្រកាសវាយដណ្ដើមបានកាលពីពេលថ្មីៗនេះ ។

លោកស្រីបានលើកឡើងលើឆានែល Telegram របស់លោកស្រីថា “ការនិយាយប្រៀបធៀបរបស់លោក Zelensky អំពីទីក្រុង Hiroshima ដែលត្រូវបានបំផ្លាញដោយគ្រាប់បែកបរមាណូរបស់អាមេរិក ទៅនឹងទីក្រុង Bakhmut របស់អ៊ុយក្រែន នៅក្រៅកិច្ចប្រជុំកំពូល G7 ក្នុងប្រទេសជប៉ុន ពិតជាធ្វើបានល្អមែនទែន ពីព្រោះទីក្រុងទាំងពីរនេះគឺសុទ្ធតែរៀបចំឡើងដោយសេតវិមាន ដូច្នេះយើងមិនចាំបាច់ចរចារកសន្តិភាពជាមួយអ៊ុយក្រែននោះទេ” ។

គួរបញ្ជាក់ថា កាលពីថ្ងៃសៅរ៍ ទី២០ ខែឧសភា ស្ថាបនិកក្រុមទាហានស៊ីឈ្នួលរុស្ស៊ី Wagner Group លោក Yevgeny Prigozhin ប្រកាសគ្រប់គ្រងបានទាំងស្រុងលើទីក្រុង Bakhmut ហើយក៏បានលើកទង់ជាតិរុស្ស៊ីនៅទីនោះផងដែរ ខណៈដែលទីក្រុង Hiroshima របស់ជប៉ុនវិញ រងការបំផ្លិចបំផ្លាញដោយការទម្លាក់គ្រាប់បែកបរមាណូរបស់អាមេរិក កាលពីអំឡុងសង្គ្រាមលោកលើកទី២ ឆ្នាំ១៩៤៥ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ បក្សប្រឆាំងធំជាងគេទី ៣ របស់ រុស្ស៊ី គាំទ្រឲ្យលោក ពូទីន ឈរឈ្មោះ បោះឆ្នោតឆ្នាំ ២០២៤