អ្នកគាំទ្រ ជំរុញឲ្យគណបក្សភឿថៃ ដកខ្លួនចេញពី ដៃគូចម្រុះ រឿងមិនបានតំណែងប្រធានសភា

អ្នកគាំទ្រគណបក្សភឿថៃ កំពុងអំពាវនាវឲ្យគណបក្សនេះ បំបែកខ្លួនចេញពីគណបក្សចលនាឆ្ពោះទៅមុខ (MFP) ជុំវិញជម្លោះប្រេះឆាផ្ទៃក្នុង ទាក់ទងនឹងតំណែងប្រធានសភា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ ពួកគេនៅតែគាំទ្រការសន្យារបស់គណបក្សភឿថៃ ដែលថានឹងបោះឆ្នោតជ្រើសរើសមេដឹកនាំ MFP លោក Pita Limjaroenrat ឲ្យធ្វើជានាយករដ្ឋមន្ត្រីថ្មី និងអនុញ្ញាតឲ្យ MFP ដឹកនាំការបង្កើតរដ្ឋាភិបាលចម្រុះថ្មីមួយ។ នេះបើតាមការបញ្ជាក់ពីលោក Niyom Nopparat ដែលជាមេក្រុមគាំទ្ររបស់គណបក្សភឿថៃ។

ក្រុមនេះក៏អំពាវនាវឲ្យបក្សភឿថៃ គាំទ្រការប៉ុនប៉ងដែលដឹកនាំដោយ MFP ក្នុងការសរសេររដ្ឋធម្មនុញ្ញឡើងវិញ ផងដែរ។

អ្នកគាំទ្រជាច្រើន បានប្រមូលផ្តុំគ្នានៅខាងក្រៅទីស្នាក់ការកណ្តាលរបស់គណបក្សភឿថៃ ក្នុងទីក្រុងបាងកកកាលពីថ្ងៃអាទិត្យទី២៨ខែឧសភា ហើយបានដាក់លិខិតចំហមួយដែលមានការអំពាវនាវទាំងនេះទៅកាន់គណបក្ស។

លោក Niyom និយាយថា ប្រសិនបើ MFP មិនទទួលបានសមាជិកសភាគ្រប់គ្រាន់ ដើម្បីបង្កើតរដ្ឋាភិបាលចម្រុះថ្មីទេនោះ ក្រុមនេះជឿថា គណបក្សភឿថៃ ដែលឈ្នះអាសនៈសភាច្រើនជាងគេលំដាប់ទីពីរបន្ទាប់ពី MFP គួរតែមានសិទ្ធិដឹកនាំការបង្កើតរដ្ឋាភិបាលចម្រុះថ្មី។

លោក​​បន្ត​ថា ក្រុម​នេះ​មាន​គោល​បំណង​ធ្វើ​ឲ្យ MFP ដឹង​ថា ពួកគេ​នឹង​ពិបាក​ក្នុង​ការ​បង្កើត​រដ្ឋាភិបាល បើ​គ្មាន​បក្សភឿថៃ​នៅ​ខាង​ខ្លួន។ យ៉ាងណា លោក​​ទទូច​ថា ហេតុផល​របស់​ក្រុម​នេះ​មិន​មែន​ជា​ល្បែង​នយោបាយ ឬ​ជា​ការ​ប៉ុនប៉ង​បង្កើត​ជម្លោះ​បន្ថែម​ទៀត ​រវាង​គណបក្ស​ភឿថៃ និង​ MFP នោះទេ។

លោកបានសង្កត់ធ្ងន់ថា ជម្លោះផ្ទៃក្នុង ក្នុងចំណោមគណបក្សចំនួនប្រាំបី ដែលបានព្រមព្រៀងគ្នាបង្កើតរដ្ឋាភិបាលរួម គឺផ្តើមចេញពីការប៉ុនប៉ងរបស់មនុស្សមួយក្រុម ដែលផ្សព្វផ្សាយព័ត៌មានមិនពិតប្រឆាំងនឹងគណបក្សភឿថៃ។

គួរបញ្ជាក់ជាថ្មី ជម្លោះត្រូវបានបង្កឡើងកាលពីថ្ងៃអង្គារសប្តាហ៍មុន ដោយអ្នកតស៊ូមតិរបស់ MFP គឺលោក Piyabutr Saengkanokkul នៅពេលគាត់ បង្ហោះ Facebook ថា គណបក្សនេះ ត្រូវតែគ្រប់គ្រងមុខតំណែងប្រធានសភា។

ភាពតានតឹង កាន់តែកើនឡើង ខណៈសមាជិកបក្សភឿថៃមួយចំនួន បានគំរាមថា គណបក្សរបស់ពួកគេនឹងចាកចេញពីក្រុមចម្រុះ ហើយមេដឹកនាំទី២ នៃគណបក្សចលនាឆ្ពោះទៅមុខគឺលោកស្រី Sirikanya Tansakul បានពន្លះយ៉ាងចាស់ដៃថា គណបក្សរបស់លោកស្រី ត្រូវការតួនាទីនេះដើម្បីជំរុញរបៀបវារៈរបស់ខ្លួន៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ គណបក្សចលនាឆ្ពោះទៅមុខ និងភឿថៃ ឈ្លោះគ្នាបែកផ្សែង ដណ្តើមតំណែងប្រធានសភា