លោក Biden ថា ទំនាក់ទំនង អាមេរិក-ចិន គឺស្ថិតនៅលើផ្លូវត្រូវ

លោកប្រធានាធិបតី Joe Biden បាននិយាយថា ទំនាក់ទំនងរវាងសហរដ្ឋអាមេរិក និងចិន គឺស្ថិតនៅលើ “ផ្លូវត្រូវ” បន្ទាប់ពីដំណើរទស្សនកិច្ចរបស់រដ្ឋមន្ត្រីការបរទេសលោក Antony Blinken ទៅកាន់ទីក្រុងប៉េកាំង ។

ប្រធានាធិបតីអាមេរិកបានលើកឡើងពីដំណើរទស្សនកិច្ចលោក Blinken ទៅកាន់ចិនក្នុងរយៈពេល ២ ថ្ងៃ គឹមានភាពល្អប្រសើរច្រើនសម្រាប់ទំនាក់ទំនងរវាងប្រទេសទាំងពីរ ។ អាមេរិករួមជាមួយចិន នឹងធ្វើឲ្យពិភពលោក មានសុវត្ថិភាពជាងមុន ហើយនឹងផ្តល់សារៈសំខាន់ដល់គ្នាទៅវិញទៅមកផងដែរ ។ 

សហរដ្ឋអាមេរិក និងចិន បានព្រមព្រៀងគ្នាក្នុងការធ្វើឲ្យទំនាក់ទំនងរបស់ពួកគេមានស្ថេរភាព និងរក្សាបណ្តាញទំនាក់ទំនងបើកចំហរ ដើម្បីចៀសវាងជម្លោះដែលកើតឡើងរវាងប្រទេសទាំងពីរ ។

គួរបញ្ជាក់ថា លោក Blinken គឺជារដ្ឋមន្ត្រីការបរទេសអាមេរិកដំបូងគេ ដែលបានជួបលោក Xi Jinping ចាប់តាំងពីឆ្នាំ ២០១៨ មក ខណៈដំបូងឡើយ លោក Blinken គ្រោងនឹងទៅទីក្រុងប៉េកាំងនៅដើមខែកុម្ភៈ ប៉ុន្តែដំណើរនោះ ត្រូវបានពន្យារពេល ដោយសារតែរឿងអាស្រូវបាឡុងចារកម្ម ៕

ប្រែសម្រួល ៖ នាង រតនៈ

ប្រភព ៖ Anadolu