ទោះរកឃើញក៏ដោយ តែគេត្រូវចំណាយពេលរាប់ម៉ោងឯណោះ ដើម្បីទាញយាន Titan ឡើងមកលើវិញ

លោក David Gallo ដែលជាអ្នករុករកសមុទ្រទឹកជ្រៅ ជឿជាក់ថា លុះត្រាតែអព្ភូតហេតុកើតឡើង ទើបអាចជួយសង្គ្រោះអ្នកដែលជាប់នៅក្នុងនាវាជ្រមុជទឹក Titan បាន ប៉ុន្តែគាត់នៅតែមានសុទិដ្ឋិនិយម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានប្រាប់កម្មវិធី Good Morning Britain របស់ទូរទស្សន៍ ITV ថា ពេលដែលក្រុមជួយសង្គ្រោះចាប់បានរលកសំឡេងនៅក្រោមទឹក ពួកគេមានជំនឿនិងទំនុកចិត្តថា វាជាសំឡេងចេញពីយានជ្រមុជទឹក ហើយក៏ប្រញាប់ប្រញាល់កំណត់ទីតាំងរបស់វា។

ទោះបីជាយ៉ាងណាក៏ដោយ ក្រុមការងារនៅផ្នែកខាងលើ ត្រូវតែរៀបចំឲ្យបានគ្រប់គ្រាន់ ព្រោះការកំណត់ទីតាំងនិងការងារទាញយកយានមកខាងលើវិញ ត្រូវចំណាយពេលរាប់ម៉ោងឯណោះ។

មូលហេតុចម្បងដែលការងារត្រូវចំណាយពេលរាប់ម៉ោងបែបនេះ គឺដោយសារតែវាមានលក្ខណៈស្មុគស្មាញនិងលំបាកខ្លាំង។ យានស្ថិតនៅទឹកដ៏ជ្រៅ ហើយឧបសគ្គមានច្រើនជាពិសេសសម្ពាធទឹក និងភាពងងឹត។

ក្នុងប្រតិបត្តិការស្វែងរក​ កងទ័ពជើងទឹកសហរដ្ឋអាមេរិក បានប្រើប្រាស់ប្រព័ន្ធជួយសង្គ្រោះមហាសមុទ្រទឹកជ្រៅ (FADOSS) ក្នុងគោលបំណងទាញនាវាឲ្យមកផ្ទៃខាងលើ។

FADOSS គឺជាប្រព័ន្ធខ្សែកាបដ៏រឹងមាំបំផុត ហើយវាត្រូវរង់ចាំយានដំណើរការពីចម្ងាយ ដើម្បីនាំយកខ្សែកាបនេះ ទៅភ្ជាប់ជាមួយនាវាជ្រមុជទឹក Titan នៅបាតមហាសមុទ្រ រួចទាញឡើងមក ។

ប្រព័ន្ធខ្សែកាបនេះ មានកម្លាំងគ្រប់គ្រាន់ដើម្បីលើកទម្ងន់បាន ២៧,០០០ គីឡូក្រាម ហើយវាអាចចុះដល់ទៅជម្រៅ ៦,០៩៦ ម៉ែត្រ ក្នុងមហាសមុទ្រ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ យានជ្រមុជទឹក Titan នឹងអស់ខ្យល់អុកស៊ីសែន នៅម៉ោង៦ល្ងាចនេះ