មិនដល់កន្លះខែផង ម៉ិកស៊ិក មានមនុស្សស្លាប់ជាង១០០នាក់ ដោយសាររលកកម្តៅ 

មិនដល់កន្លះខែផង ប្រទេសម៉ិកស៊ិក មានមនុស្សរហូតដល់ទៅជាង ១០០ នាក់ទៅហើយត្រូវបាត់បង់ជីវិត ដោយសារកម្តៅក្តៅខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធនឹងបញ្ហានេះដែរ អ្នកវិទ្យាសាស្ត្រនិយាយថា ការឡើងកម្តៅផែនដី កំពុងធ្វើឲ្យអាកាសធាតុកាន់តែអាក្រក់ទៅៗ ដោយប្រទេសជាច្រើនបានជួបប្រទះនូវសីតុណ្ហភាពខ្ពស់បំផុត មិនធ្លាប់មាន។

បើយោងតាមតួលេខរបស់ក្រសួងសុខាភិបាលដែលចេញផ្សាយកាលពីថ្ងៃពុធ ទី២៨ ខែមិថុនាបានឲ្យដឹងថា គ្រោះអាសន្នទាក់ទងនឹងកម្តៅជាង ១ ពាន់លើក ត្រូវបានរាយការណ៍នៅក្នុងប្រទេសម៉ិកស៊ិកចន្លោះថ្ងៃទី១២ ខែមិថុនា ដល់ថ្ងៃទី២៥ ខែមិថុនា ដែលបណ្តាលឲ្យមនុស្សចំនួន ១០៤ នាក់ស្លាប់ ខណៈមូលហេតុ​ចម្បងនៃការស្លាប់នេះ ​គឺដោយសារ​ជំងឺ​ដាច់​សរសៃ​ឈាម និងការ​ខ្សោះ​ជាតិ​ទឹក ​។

ស្របពេលជាមួយគ្នានេះ តំបន់ភាគខាងជើងប្រទេសម៉ិកស៊ិក ជាកន្លែងមានមនុស្សស្លាប់ច្រើនជាងគេ ពោលគឺមាន ៦៤ នាក់ត្រូវបានកត់ត្រានៅក្នុងរដ្ឋ Nuevo Leon និង ១៩ នាក់ទៀតនៅតំបន់ Tamaulipas ។

ទោះបីជាយ៉ាងណាក៏ដោយ អាជ្ញាធរព្រមានក៏បានព្រមានផងដែរថា រលកកម្តៅមួយផ្សេងទៀតនឹងអាចប៉ះពាល់ដល់ប្រទេសម៉ិកស៊ិក ចាប់ពីថ្ងៃទី១ ខែកក្កដាទៅ ខណៈសីតុណ្ហភាពអតិបរិមានៅប្រទេសដែលមានប្រជាជនចំនួន ១២៧ លាននាក់មួយនេះ ក្នុងអំឡុងរដូវក្តៅ គឺប្រែប្រួលចន្លោះពី ៣០ ទៅ ៤៥ អង្សាសេ ៕

ប្រែសម្រួល៖ Vann Vann

ប្រភព៖ CNA

ចុចអាន៖ រលកកម្តៅ កំពុងវាយប្រហារខ្លាំងក្លា ទូទាំងទ្វីប អឺរ៉ុប