មកដឹងប្រាក់បៀវត្សរ៍ប្រចាំខែរបស់មន្ត្រីរាជការនៅ ឡាវ

លោក Oudom Vongkaisone តំណាងរាស្រ្ដមកពីខេត្ត Bolikhamxay របស់ប្រទេសឡាវបានទម្លាយប្រាប់ពីប្រាក់បៀវត្សរ៍ប្រចាំខែរបស់មន្ត្រីរាជការនៅក្នុងសម័យប្រជុំសាមញ្ញលើកទី៥ នៃរដ្ឋសភានីតិកាលទី៩ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Oudom បានប្រាប់ឲ្យដឹងថា មន្ត្រីរាជការ ជាពិសេសអ្នកជំនាញក្នុងវិស័យរដ្ឋាភិបាលឡាវ ទទួលបានប្រាក់បៀវត្សរ៍ជាមធ្យមប្រចាំខែប្រហែល ១០៥ ដុល្លារប៉ុណ្ណោះ ខណៈការចំណាយលើការរស់នៅជាក់ស្តែងរបស់ពួកគេវិញ គឺខ្ពស់ជាងនេះ ដោយសារតម្លៃទំនិញ និងសេវាកម្មផ្សេងៗទៀតនៅក្នុងប្រទេស បានហក់ឡើងខ្ពស់គួរឲ្យកត់សម្គាល់ ។

នៅក្នុងសម័យប្រជុំនោះទៀតសោត អ្នកតំណាងរាស្ត្ររូបនេះក៏បានស្នើដល់រដ្ឋាភិបាលឡាវ ឲ្យបង្កើនប្រាក់បៀវត្សរ៍ប្រចាំខែដល់មន្ត្រីរាជការផងដែរ បើទោះមានអតិផរណាខ្ពស់ និងថ្លៃដើមកើនឡើងក៏ដោយ ដោយជំរុញឲ្យរដ្ឋាភិបាលស្វែងរកដំណោះស្រាយ ដើម្បីឲ្យមន្ត្រីរាជការ និងកម្មករនៅប្រទេសឡាវ ទទួលបានប្រាក់កម្រៃសមរម្យសម្រាប់ការងាររបស់ពួកគេ ។

ស្របពេលជាមួយគ្នានេះ លោក Oudom បានលើកឡើងទៀតថា រដ្ឋាភិបាលឡាវគួរតែបង្កើនប្រាក់ឧបត្ថម្ភ ផ្តល់ជំនួយហិរញ្ញវត្ថុ និងពិចារណាលើគោលនយោបាយជួយមន្ត្រីរាជការដែលមានបញ្ហាសេដ្ឋកិច្ច បើទោះបីជារដ្ឋសភា​បាន​ដំឡើង​ប្រាក់​ឧបត្ថម្ភ​ជីវភាព​ដល់​មន្ត្រីរាជការ និង​បុគ្គលិក​ចូល​និវត្តន៍​ប្រហែល ៧ ​ដុល្លារក្នុង​មួយ​ខែ កាលពី​ដើមឆ្នាំ​២០២៣ នេះក៏ដោយ ៕

ប្រែសម្រួលដោយ ៖ ជីវ័ន្ត

ប្រភព ៖ Laotian Times

ចុចអាន ៖ នៅសល់ជនសង្ស័យប្រដាប់អាវុធ ៥ នាក់ទៀត វៀតណាម មិនទាន់ចាប់បាន ក្រោយរត់ចេញពីខេត្តជាប់ កម្ពុជា