ដឹងទេ ប្រធានសភា ថៃ ទទួលបានប្រាក់ខែប៉ុន្មាន?

បន្ទាប់ពីមានភាពជាប់គាំងអស់រយៈពេលជាច្រើនសប្ដាហ៍ ពេលនេះកៅអីប្រធានសភាថៃត្រូវបានរកឃើញហើយ ដោយគណបក្សចលនាឆ្ពោះទៅមុខ និងបក្សភឿថៃសម្រេចជ្រើសតាំងមេដឹកនាំគណបក្ស ប្រាឆាឆាត លោក Wan Muhamad Noor Matha ឲ្យកាន់តំណែងមួយនេះ ។

ទន្ទឹមនោះ ក្រោយការសម្រេចជ្រើសបានប្រធានសភារួចហើយ ក៏មានការបង្ហាញពីប្រាក់បៀវត្សរ៍ក្នុងតំណែងមួយនេះផងដែរ ដោយនៅក្រោមរដ្ឋធម្មនុញ្ញបច្ចុប្បន្ន ប្រធានសភានឹងទទួលបានទឹកប្រាក់ចំនួន ២,១៦៥ ដុល្លារ បូករួមនឹងប្រាក់ឧបត្ថម្ភមុខតំណែងចំនួន ១,៤៣៥ ដុល្លារ សរុបមកតំណែងមួយនេះទទួលបានប្រាក់បៀវត្សរ៍ ៣,៦០០ ដុល្លារក្នុងមួយខែ ។

ទន្ទឹមនោះ ក្រៅពីទទួលបានប្រាក់បៀវត្ស៍ប្រចាំខែហើយ, ប្រធានសភា ក៏ដូចជាសមាជិកសភាផ្សេងទៀតរបស់ថៃ ក៏មានសិទ្ធិទទួលបានប្រាក់ឧបត្ថម្ភដឹកជញ្ជូនផងដែរ នៅពេលពួកគេចូលរួមកិច្ចប្រជុំសភា ខណៈសម្រាប់ការធ្វើដំណើរទៅក្រៅប្រទេសដើម្បីកិច្ចការរដ្ឋ មានតែប្រធានសភា និងតំណាងរាស្រ្ដប៉ុណ្ណោះដែលមានសិទ្ធិទទួលការធានារ៉ាប់រងលើការចំណាយទាំងស្រុងលើការធ្វើដំណើររបស់ពួកគេ ។

ស្របពេលជាមួយគ្នានេះ ប្រធានសភាថៃក៏ទទួលបានអត្ថប្រយោជន៍ផ្នែកវេជ្ជសាស្ត្រផងដែរ ដូចជាការព្យាបាលអ្នកជំងឺក្នុងបន្ទប់សង្គ្រោះបន្ទាន់ ICU ការវះកាត់ ការសម្រាលកូន ការព្យាបាលធ្មេញ និងការពិនិត្យផ្សេងៗទៀតផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ មកដឹងប្រាក់បៀវត្សរ៍ប្រចាំខែរបស់មន្ត្រីរាជការនៅ ឡាវ