លោក Biden ប្រាប់ដំណោះស្រាយបញ្ចប់សង្គ្រាមទៅលោក Zelensky ហើយប្រើពេលតែ ៥ នាទីប៉ុណ្ណោះ

ប្រធានាធិបតីអ៊ុយក្រែន លោក Volodymyr Zelensky បានលើកឡើងថា ប្រធានាធិបតីសហរដ្ឋអាមេរិកលោក Joe Biden បានប្រាប់លោកហើយថា អាមេរិកអាចបញ្ចប់ជម្លោះនៅអ៊ុយក្រែនក្នុងរយៈពេលតែ ៥ នាទីប៉ុណ្ណោះ ហើយដំណោះស្រាយនោះគឺឲ្យអ៊ុយក្រែនបោះបង់ទឹកដីទៅរុស្ស៊ី ប៉ុន្តែរដ្ឋាភិបាលទីក្រុងមិនយល់ព្រមឡើយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Zelensky បាននិយាយនៅក្នុងបទសម្ភាសន៍ជាមួយសារព័ត៌មាន ABC News ថា “ប្រសិនបើយើងធ្វើតាមរបៀបបញ្ចប់សង្រ្គាមដោយការចំណាយប្រាក់របស់អ៊ុយក្រែន ឬឲ្យយើងបោះបង់ទឹកដីរបស់យើងចោលនោះ, លោក Biden អាចនឹងបញ្ចប់វាតែក្នុងរយៈពេល ៥ នាទីប៉ុណ្ណោះ ប៉ុន្តែខ្ញុំនឹងមិនយល់ស្របតាមគាត់ឡើយ” ។

ទន្ទឹមនោះ លោក Zelensky ក៏បានអត្ថាធិប្បាយលើការកត់សម្គាល់របស់អតីតប្រធានាធិបតីអាមេរិកលោក Donald Trump ផងដែរអំពីការប្តេជ្ញារបស់លោកថានឹងបញ្ឈប់ការប្រយុទ្ធនៅអ៊ុយក្រែនត្រឹមតែក្នុងរយៈពេល ២៤ ម៉ោង ។

លោកប្រធានាធិបតីអ៊ុយក្រែនបានរំលឹកឡើងវិញថា លោក Trump មានឱកាសនោះរួចទៅហើយ អំឡុងពេលដែលលោកកំពុងកាន់តំណែង ។ ពេលនោះអ៊ុយក្រែនស្ថិតក្នុងសង្គ្រាមរួចទៅហើយ ដោយគ្រាន់តែមិនមែនជាសង្គ្រាមទ្រង់ទ្រាយធំ ប៉ុន្តែអតីតប្រធានាធិបតីអាមេរិករូបនេះបានជ្រើសរើសយកអាទិភាពមួយចំនួនផ្សេងទៀតដោយមើលរំលងអ៊ុយក្រែនទៅវិញ ។

គួរបញ្ជាក់ថា រហូតមកដល់ពេលនេះ សង្គ្រាមរវាងរុស្ស៊ី និងអ៊ុយក្រែន បានអូសបន្លាយពេលដល់ជាង ៥០០ ថ្ងៃមកហើយ បន្ទាប់ពីលោក Vladimir Putin បញ្ជាឲ្យបើកប្រតិបត្តិការវាយលុកទៅលើកងកម្លាំងទីក្រុងកៀវកាលពីថ្ងៃទី២៤ ខែកុម្ភៈ ឆ្នាំ២០២២ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ អាមេរិក ថា ការផ្ដល់គ្រាប់បែកចង្កោមទៅឲ្យ អ៊ុយក្រែន នឹងមិនបង្កការ ប្រេះឆាគ្នាក្នុងសម្ព័ន្ធមិត្តណាតូឡើយ