ភ្នាក់ងារអាកាសធាតុ UN ចាត់ទុកសីតុណ្ហភាពក្នុងខែមិថុនា ក្ដៅបំផុតក្នុងកំណត់ត្រាពិភពលោក

អង្គការ​ឧតុនិយម​ពិភពលោក​របស់​អង្គការសហប្រជាជាតិ​ (UN) បាននិយាយ​ថា សីតុណ្ហភាពជាមធ្យមនៅលើពិភពលោក​សម្រាប់​ខែមិថុនា​ បាន​ហក់ឡើង​ដល់​កម្រិត​ខ្ពស់​បំផុតក្នុងកំណត់ត្រា ។

អង្គការឧតុនិយម​ពិភពលោក (WMO) បាននិយាយថា របាយការណ៍ពីទីភ្នាក់ងារអាកាសធាតុ Copernicus របស់សហភាពអឺរ៉ុបបានបង្ហាញពីសីតុណ្ហភាពសកលសម្រាប់ខែមិថុនា គឺលើសពី ០.៥ អង្សាសេ ដោយលើសពីមធ្យមភាគក្នុងឆ្នាំ ១៩៩១ និងឆ្នាំ ២០២០ ។

WMO បានឲ្យដឹងថា សីតុណ្ហភាពដ៏ក្ដៅនេះ ជាពិសេសនៅក្នុងខែមិថុនា និងនៅដើមខែកក្កដា បានកើតឡើងនៅពេលចាប់ផ្តើមដំណើរនៃបាតុភូត El Nino ដែលត្រូវបានគេរំពឹងថា នឹងជំរុញកំដៅបន្ថែមទៀតទាំងនៅលើផ្ទៃដី និងក្នុងមហាសមុទ្រ ។

ស្របពេលជាមួយគ្នានេះ យោងតាមទីភ្នាក់ងារអង្គការសហប្រជាជាតិបានបញ្ជាក់ទៀតថា សីតុណ្ហភាពលើផ្ទៃសមុទ្រពិភពលោកក៏បានឈានដល់កម្រិតខ្ពស់បំផុតសម្រាប់ខែឧសភា និងខែមិថុនាផងដែរ ។ ជាក់ស្ដែង ទឹកកកសមុទ្រតំបន់អង់តាក់ទិកបានរលាយដល់កម្រិតទាបបំផុតក្នុងខែមិថុនា ពោលមានរហូតដល់ ១៧ ភាគរយឯណោះ ៕

ប្រែសម្រួល៖ នាង រតនៈ

ប្រភព៖ NHK