ការស្រាវជ្រាវ ៖ ផ្ទាំងទឹកកកនៅតំបន់ Greenland ប្រហែលជាចាប់ផ្ដើមរលាយកាលពី ៤០ ម៉ឺនឆ្នាំមុនមកម្ល៉េះ

ក្រុមអ្នកស្រាវជ្រាវរបស់សហរដ្ឋអាមេរិកបាននិយាយថា ផ្ទាំងទឹកកករបស់តំបន់ Greenland ប្រហែលជាចាប់ផ្ដើមរលាយក្នុងអំឡុងពេលផែនដីជួបប្រទះអាកាសធាតុដ៏ក្តៅគគុក កាលពីជាង ៤០ ម៉ឺនឆ្នាំមុនមកម្ល៉េះ ។

អ្នកស្រាវជ្រាវបានធ្វើការសន្និដ្ឋានបែបនេះ ដោយផ្អែកលើការប្រើប្រាស់បច្ចេកវិទ្យាទំនើបដើម្បីវិភាគលើដីខ្សាច់ និងដីល្បាប់ផ្សេងទៀតដែលប្រមូលបាននៅក្រោមផ្ទាំងទឹកកកនៅឯតំបន់ Camp Century ដែលជាមូលដ្ឋានយោធាសម្ងាត់របស់សហរដ្ឋអាមេរិកក្នុងទសវត្សរ៍ឆ្នាំ ១៩៦០ ហើយជាលទ្ធផល​បាន​បង្ហាញ​ថា ​មួយ​ផ្នែក​ធំ​នៃតំបន់ Greenland គឺមានទឹកកក​រលាយប្រហែល ៤០ ម៉ឺនឆ្នាំ​មុនម្ល៉េះ ។

មិនតែប៉ុណ្ណោះ ក្រុមអ្នកស្រាវជ្រាវថែមទាំងបាននិយាយថា ការសិក្សារបស់ពួកគេផ្ទុយនឹងទស្សនៈដែលថា ផ្ទាំងទឹកកកភាគច្រើនរបស់តំបន់ Greenland ត្រូវបានកកក្នុងរយៈពេល ២.៥ លានឆ្នាំមុន ។

លើសពីនេះ ក្រុម​អ្នកស្រាវជ្រាវ​ព្រមានទៀត​ថា ការ​រក​ឃើញ​របស់​ខ្លួន​ពី​ផ្ទាំង​ទឹកកកនេះ អាច​បណ្ដាលមកពី​ការ​ប្រែប្រួល​អាកាសធាតុ​ ដោយសារតែមកពីកត្តាមនុស្ស ការឡើងកម្ដៅផែនដី និងការកើនឡើងនៃកម្រិតទឹកសមុទ្រនៅសតវត្សខាងមុខជាដើម ៕

ប្រែសម្រួល៖ នាង រតនៈ

ប្រភព ៖​ NHK