ព័ត៌មានអន្ដរជាតិ

លោក ពូទីន បង្អួតកម្លាំងយោធា និងសព្វាវុធទំនើបៗ ក្នុងទិវាកងទ័ពជើងទឹករុស្ស៊ី

បានផុស

៣ ខែ មុន

នៅ

ថ្ងៃចន្ទ ៣១ កក្កដា ២០២៣

ដោយ

លោក វ្ល៉ាឌីមៀរ ពូទីន បានបង្ហាញពីកម្លាំងយោធារបស់រុស្ស៊ី ជាមួយនឹងនាវាចម្បាំង នាវាមុជទឹកនុយក្លេអ៊ែរ និងនាវិកជាច្រើននាក់ នៅក្នុងពិធីអបអរសាទរទិវាកងទ័ពជើងទឹកប្រចាំឆ្នាំរបស់ប្រទេសកាលពីថ្ងៃអាទិត្យទី២៩ខែកក្កដា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាវា ៤៥ គ្រឿងបូករួមនឹងនាវាមុជទឹកជាច្រើនគ្រឿងទៀត បានចូលរួមក្នុងទិវាកងទ័ពជើងទឹកប្រចាំឆ្នាំរបស់ប្រទេសរុស្ស៊ី ដែលធ្វើឡើងនៅឈូងសមុទ្រហ្វាំងឡង់ និងនៅលើដងទន្លេ Neva ក្នុងទីក្រុង St Petersburg ខណៈកងទ័ពជើងទឹកប្រហែល ៣,០០០ នាក់ ក៏បានចូលរួមក្នុងក្បួនព្យុហយាត្រាលើដីគោកផងដែរ ។

អមដំណើរដោយរដ្ឋមន្ត្រីការពារជាតិ Sergei Shoigu និងមេទ័ពជើងទឹក Nikolai Yevmenov, លោក ពូទីន បានត្រួតពិនិត្យនាវាមួយចំនួន នៅលើទន្លេ Neva រួចមកលោកបានផ្តោតមើលការបង្ហាញសមត្ថភាពកងទ័ពជើងទឹក មុនពេលថ្លែងសុន្ទរកថា។

លោក ពូទីន និយាយថា “ថ្ងៃនេះ រុស្ស៊ីកំពុងអនុវត្តប្រកបដោយទំនុកចិត្ត នូវភារកិច្ចទ្រង់ទ្រាយធំនៃគោលនយោបាយដែនសមុទ្រជាតិរបស់យើង និងកំពុងកសាងកម្លាំងនៃកងទ័ពជើងទឹករបស់យើងយ៉ាងខ្ជាប់ខ្ជួន។ ត្រឹមមួយឆ្នាំនេះ មាននាវាចំនួន ៣០ ប្រភេទផ្សេងៗគ្នា ត្រូវបានបន្ថែមទៅកងនាវា”។

ទោះបីជាយ៉ាងណាក៏ដោយ លោកមិនបានធ្វើអត្ថាធិប្បាយអំពីអ្វីដែលរុស្ស៊ីហៅថា ជាប្រតិបត្តិការយោធាពិសេសរបស់ខ្លួននៅអ៊ុយក្រែននោះទេ។

គួរបញ្ជាក់ថា ការបង្ហាញនេះ កើតឡើងបន្ទាប់ពីយន្តហោះគ្មានមនុស្សបើកចំនួន ៣គ្រឿងបានវាយប្រហារអគារការិយាល័យ និងអគារខ្ពស់ៗកប់ពពកក្នុងទីក្រុងមូស្គូ ដែលក្រសួងការពារជាតិរុស្ស៊ី អះអាងថាជាការប៉ុនប៉ងវាយប្រហារភេរវកម្មដោយទីក្រុងកៀវ៕