ភឿថៃ ចាប់ដៃគូជាមួយបក្សឈ្នះឆ្នោតលំដាប់ទី ៣ ដើម្បីបង្កើតរដ្ឋាភិបាលថ្មី

គណបក្សភឿថៃកាលលពីថ្ងៃចន្ទបានប្រកាសចាប់ដៃជាមួយបក្សភូមិចៃថៃ ដែលជាគណបក្សឈ្នះឆ្នោតលំដាប់ទី ៣ នៅក្នុងរដ្ឋសភា ដើម្បីបង្កើតរដ្ឋាភិបាលថ្មី បន្ទាប់ពីគណបក្សរបស់កូនស្រីលោក ថាក់ស៊ីន មួយនេះបានប្រកាសបំបែកខ្លួនចេញពីគណបក្សចលនាឆ្ពោះទៅមុខរបស់លោក Pita Limjaoenrat ។

ពាក់ព័ន្ធនឹងបញ្ហានេះដែរ រដ្ឋមន្ត្រីក្រសួងសុខភាពសាធារណៈដែលផុតអាណត្តិលោក Anutin Charnvirakul និងជាមេដឹកនាំគណបក្សភូមិចៃថៃ បាននិយាយថា គណបក្សភូមិចៃថៃ បានយល់ព្រមក្នុងការចាប់ដៃគ្នាបង្កើតរដ្ឋាភិបាលជាមួយបក្សភឿថៃ ដោយឈរលើគោលការណ៍ចំនួន ៣ គឺទី១ មិនជ្រៀតជ្រែកជាមួយមាត្រា ១១២ ឬច្បាប់ប្រមាថព្រះមហាក្សត្រ ទី២ បក្សភឿថៃជារដ្ឋាភិបាលសំឡេងភាគច្រើន និងទី៣ បក្សចលនាឆ្ពោះទៅមុខលែងជាផ្នែករបស់រដ្ឋាភិបាលចម្រុះ ។

លោក Anutin បាននិយាយទៀតថា “យើងនឹងធ្វើការរួមគ្នាដើម្បីទទួលបានការគាំទ្រពីសមាជិករដ្ឋសភា និងព្រឹទ្ធសភា ដើម្បីធានាថា អ្វីៗនឹងដំណើរការទៅតាមរដ្ឋធម្មនុញ្ញ ដើម្បីជាប្រយោជន៍ដល់ប្រជាជន និងប្រទេសជាតិ ហើយចំពោះបេក្ខភាពនាយករដ្ឋមន្ត្រីវិញ គណបក្សភូមិចៃថៃ នឹងធ្វើតាមសំណើរបស់បក្សភឿថៃ ដែលដាក់ជូន និងអនុម័តដោយសមាជិកសភា” ។

បើបូកចូលគ្នា គណបក្សទាំងពីរមានសំឡេងក្នុងរដ្ឋសភាចំនួន ២១២ បន្ទាប់ពីគណបក្សភឿថៃដែលជាបក្សឈ្នះឆ្នោតលំដាប់ទី២ ទទួលបាន ១៤១ សំឡេង ខណៈបក្សភូមិចៃថៃ មានសំឡេង ៧១ ក្នុងការបោះឆ្នោតសកលថ្ងៃទី១៤ ខែឧសភា ។ ទោះជាយ៉ាងណា ក្រុមចម្រុះមួយនេះក៏នឹងត្រៀមប្រមែប្រមូលគណបក្សផ្សេងទៀតផងដែរ ដោយសារតែការបង្កើតរដ្ឋាភិបាលថ្មីរបស់ថៃ ត្រូវការសំឡេងគាំទ្រយ៉ាងតិច ៣៧៥ នៃអាសនៈសភាទាំង ៥០០ ។

គួរបញ្ជាក់ថា បើមិនមានអ្វីប្រែប្រួលទេនោះ សម័យប្រជុំរួមគ្នានៃរដ្ឋសភា និងព្រឹទ្ធសភាថៃដើម្បីបោះឆ្នោតជ្រើសរើសនាយករដ្ឋមន្ត្រីទី ៣០ របស់ប្រទេស អាចនឹងប្រព្រឹត្តទៅចន្លោះថ្ងៃទី១៨ ឬថ្ងៃទី១៩ ខែសីហា ពោលរយៈពេល ៣ ថ្ងៃ ក្រោយតុលាការធម្មនុញ្ញធ្វើសេចក្ដីសម្រេចលើញត្តិទាក់ទងនឹងការបន្ត ឬដកសិទ្ធិលោក Pita លែងឲ្យឈរឈ្មោះជានាយករដ្ឋមន្ត្រីឬយ៉ាងណា ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ សភា ថៃ ប្រកាសថ្ងៃបោះឆ្នោតជ្រើសរើសនាយករដ្ឋមន្ត្រីជុំបន្ទាប់