ភ្លើងឆេះព្រៃនៅ ហាវ៉ៃ ដុតកម្ទេចទីក្រុង​ប្រវត្តិសាស្ត្រមួយ ស្ទើរតែទាំងស្រុង

ភ្លើង​ឆេះ​ព្រៃ​ដ៏​សន្ធោសន្ធៅ​ ដែលរាលដាលខ្លាំងដោយសារតែខ្យល់​ព្យុះ​សង្ឃរា ​Dora បាន​បំផ្លិចបំផ្លាញ​ទីក្រុង​ប្រវត្តិសាស្ត្រ Lahaina លើ​កោះ Maui នៃ​រដ្ឋ ហាវ៉ៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Brian Schatz សមាជិកព្រឹទ្ធសភាអាមេរិកមកពីរដ្ឋនេះ បាននិយាយនៅលើប្រព័ន្ធផ្សព្វផ្សាយសង្គមថា ទីក្រុង Lahaina ស្ទើរតែឆេះខ្ទេចទាំងស្រុង ខណៈមនុស្សចំនួន៣៦នាក់ ត្រូវបាត់បង់ជីវិត។

ស្របពេលជាមួយគ្នានោះ មន្ទីរពេទ្យកោះ Maui គឺពោរពេញដោយអ្នករបួសរលាក និងមនុស្សដែលមិនស្រួលខ្លួនដោយសារតែស្រូបផ្សែង។

ទន្ទឹមនោះ មានសេចក្តីរាយការណ៍កាលពីព្រឹកថ្ងៃពុធទី៩ខែសីហាថា មនុស្សមួយចំនួនបានលោតចូលទៅក្នុងមហាសមុទ្រ ដើម្បីគេចពីអណ្តាតភ្លើងដែលកំពុងឆេះរាលយ៉ាងលឿន ហើយឆ្មាំសមុទ្រអាមេរិកនិយាយថា ខ្លួនបានជួយសង្គ្រោះមនុស្សរាប់សិបនាក់ ចេញពីទឹក។

អភិបាលកោះ Maui លោក Richard Bissen Jr បានអះអាងនៅក្នុងសន្និសីទសារព័ត៌មានមួយថា ផ្ទះនិងរចនាសម្ព័ន្ធអាជីវកម្មជាច្រើន ត្រូវបានបំផ្លាញទាំងស្រុង។

ទោះបីជាយ៉ាងណាក៏ដោយ ក្រុមមន្ត្រីបានគូសបញ្ជាក់ ខ្លួននៅតែពិបាក ក្នុងការកំណត់អំពីទំហំពិតប្រាកដនៃការខូចខាតលើកោះ Maui ហើយព្រមានថា ចំនួនអ្នកស្លាប់ អាចនឹងកើនឡើងបន្ថែមទៀត។

ម្យ៉ាងវិញទៀត មនុស្សរាប់ម៉ឺននាក់នៅតែគ្មានអគ្គិសនី ឬសេវាទូរស័ព្ទដៃ ដោយសារតែភ្លើងឆេះ ហើយសេវាកម្ម៩១១ នៅ West Maui ត្រូវកាត់ផ្តាច់កាលពីថ្ងៃពុធ។

ពាក់ព័ន្ធនឹងបញ្ហានេះដែរ លោកប្រធានាធិបតី Joe Biden បាននិយាយនៅក្នុងសេចក្តីថ្លែងការណ៍មួយថា រដ្ឋាភិបាលសហព័ន្ធ បានបញ្ជូនជំនួយទៅរដ្ឋហាវ៉ៃ រួចហើយ។

សូមបញ្ជាក់ថា Lahaina គឺជាទីក្រុងប្រវត្តិសាស្ត្រមួយនៅភាគខាងលិចកោះ Maui ។ មជ្ឈមណ្ឌលរបស់កោះនេះ មានអាយុកាលតាំងពីទសវត្សរ៍ឆ្នាំ១៧០០មក ហើយស្ថិតនៅក្នុងការចុះបញ្ជីជាតិនៃទីតាំងប្រវត្តិសាស្ត្ររបស់សហរដ្ឋអាមេរិក៕

ប្រែសម្រួល៖ Vann Vann

ប្រភព៖ BBC

ចុចអាន៖ ភ្លើង​ឆេះ​ព្រៃ​នៅ​តំបន់មេឌីទែរ៉ាណេ ​សម្លាប់​មនុស្ស​ជាង​ ៤០​នាក់