ភ្លើង​ឆេះ​ព្រៃ​នៅ​តំបន់មេឌីទែរ៉ាណេ ​សម្លាប់​មនុស្ស​ជាង​ ៤០​នាក់

មនុស្សជាង ៤០ នាក់ដែលភាគច្រើនគឺនៅក្នុងប្រទេសអាល់ហ្សេរីបានស្លាប់ ដោយសារភ្លើងឆេះព្រៃនៅតំបន់មេឌីទែរ៉ាណេ ដែលគំរាមកំហែងដល់ភូមិនិងរមណីយដ្ឋាននានា ខណៈមនុស្សរាប់ម៉ឺននាក់ក៏ត្រូវបានជម្លៀសចេញផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនោះ ប្រទេសក្រិក ​កំពុង​រៀបចំ​ជើងហោះហើរ​ជម្លៀស​បន្ថែមទៀតចេញ​ពី​ទីក្រុង Rhodes ខណៈ​ក៏មានភ្លើង​​ឆេះ​សន្ធោសន្ធៅ​លើ​កោះ Corfu និង Evia ផងដែរ ។

រលកកម្តៅនាពេលបច្ចុប្បន្ន មិនបង្ហាញសញ្ញានៃការថមថយនោះទេ ដោយសីតុណ្ហភាព ត្រូវបានគេរំពឹងថា នឹងកើនឡើងលើស៤៤អង្សាសេ នៅផ្នែកខ្លះនៃប្រទេសក្រិក។

គិតត្រឹមពេលនេះ ចំនួនអ្នកស្លាប់ច្រើនបំផុត គឺនៅក្នុងប្រទេសអាល់ហ្សេរី ដោយនៅទីនោះ ជនរងគ្រោះចំនួន៣៤នាក់ រួមមានទាហាន១០នាក់ផងដែរ ត្រូវបានឡោមព័ទ្ធដោយអណ្តាតភ្លើងក្នុងអំឡុងពេលជម្លៀសមនុស្សនៅក្នុងខេត្តឆ្នេរសមុទ្រ Bejaia។ Bejaia គឺជាតំបន់ដែលរងគ្រោះខ្លាំងជាងគេ ពោលគឺមានមនុស្សស្លាប់រហូតដល់ទៅ២៣នាក់។

ទោះបីជាយ៉ាងណាក៏ដោយ អាជ្ញាធរអាល់ហ្សេរីអះអាងថា ៨០% នៃភ្លើង ត្រូវបានពន្លត់ចាប់តាំងពីថ្ងៃអាទិត្យមកម្ល៉េះ ប៉ុន្តែកិច្ចខិតខំប្រឹងប្រែងពន្លត់ទ្រង់ទ្រាយធំនៅតែបន្ត ដោយមានការចូលរួមពីសំណាក់ក្រុមការងារប្រហែល៨០០០នាក់ រថយន្តពន្លត់អគ្គិភ័យរាប់រយគ្រឿង និងយន្តហោះមួយចំនួន។

ភ្លើង ក៏បានឆាបឆេះផងដែរនៅក្នុងប្រទេសជិតខាង ទុយនីស៊ី ជាកន្លែងមនុស្ស៣០០នាក់ត្រូវជម្លៀសចេញពីភូមិ Melloula។

ដោយឡែក នៅលើកោះ Evia ភាគខាងជើងទីក្រុង អាថែន ភីឡុតពីរនាក់ត្រូវបាត់បង់ជីវិត នៅពេលយន្តហោះពន្លត់អគ្គិភ័យ Canadair ធ្លាក់ចូលជ្រោះ៕

ប្រែសម្រួល៖ Vann Vann

ប្រភព៖ BBC

ចុចអាន៖ គ្រោះធម្មជាតិ២ខុសគ្នា វាយប្រហារអឺរ៉ុប៖ ភាគខាងត្បូងជួបរលកកម្តៅ ភាគខាងជើងមានព្យុះ