ព័ត៌មានអន្ដរជាតិ

ការយាងចូលមកមាតុភូមិរបស់បុត្រាស្ដេច ថៃ ដែលគង់និរទេស២៧ឆ្នាំ បង្កើតភាពភ្ញាក់ផ្អើលពីសារព័ត៌មានពិភពលោក

បានផុស

៣ years មុន

នៅ

ថ្ងៃសុក្រ ១១ សីហា ២០២៣

ដោយ

ការយាងត្រលប់ចូលប្រទេសថៃរបស់បុត្រា Vacharaesorn Vivacharawongse បានធ្វើឲ្យប្រព័ន្ធផ្សព្វផ្សាយធំៗភ្ញាក់ផ្អើលយ៉ាងខ្លាំង ខណៈនៅលើគេហទំព័រ X ប្រជាជនជាច្រើនបានបង្កើត hashtag គាំទ្រទ្រង់ជាង ៣៩០,០០០ ដងឯណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំណើរទស្សនកិច្ចរបស់ទ្រង់បានទទួលការចាប់អារម្មណ៍ខ្លាំង ទាំងក្នុងប្រព័ន្ធផ្សព្វផ្សាយក្នុងស្រុក និងអន្តរជាតិរួមមាន CNN, BBC និង Reuters។ នេះក៏ដោយសារតែព្រះចៅ Vacharaesorn ជាបុត្រច្បងទីពីររបស់ព្រះមហាក្សត្រ Maha Vajiralongorn និងអតីតមហេសី Sujarinee Vivacharawongse ដែលបាននិរទេសជាមួយមាតានិងបងប្អូនប្រុសទ្រង់៣អង្គទៀត អស់រយៈពេលជាង២៧ឆ្នាំមកហើយ។

យ៉ាងណាមិញ ការមកដល់អាកាសយានដ្ឋានអន្តរជាតិសុវណ្ណភូមិ កាលពីថ្ងៃទី០៥ ខែសីហា ធ្វើឡើងក្នុងគោលបំណងជារឿងតូចតាចប៉ុណ្ណោះ។ ប៉ុន្តែព័ត៌មានបានរីករាលដាលយ៉ាងរហ័ស បន្ទាប់ពីមនុស្សមួយចំនួននៅប្រលានយន្តហោះចេញមកទទួលស្វាគមន៍ទ្រង់ដោយទឹកមុខរំភើបនិងសប្បាយចិត្តជាខ្លាំង។

ក្នុងនោះទ្រង់បានប្រាប់ប្រព័ន្ធផ្សព្វផ្សាយថា “ខ្ញុំពិតជារីករាយដែលបានត្រលប់ទៅប្រទេសថៃវិញ ខ្ញុំត្រូវបានស្វាគមន៍យ៉ាងកក់ក្ដៅ។ ខ្ញុំបានទៅឆ្ងាយអស់រយៈពេល ២៧ ឆ្នាំ។ វាដូចជាសុបិនក្លាយជាការពិតក្នុងការត្រលប់មកទីនេះ។ មុនពេលយន្តហោះចុះចត ខ្ញុំបានមើលទៅក្រៅបង្អួច ហើយមានអារម្មណ៍រំជួលចិត្ត និងដឹងគុណចំពោះប្រទេសនេះ”។

ទ្រង់ក៏មានបន្ទូលបន្ថែមទៀតថា ទ្រង់មិនដែលភ្លេចទេថាខ្លួនជាជនជាតិថៃ។ មិនដែលភ្លេចអំពីសារៈសំខាន់នៃវប្បធម៌ថៃទេ។ ហើយពេលនៅក្រៅប្រទេស ទ្រង់បានចំណាយពេលផ្សព្វផ្សាយវប្បធម៌ ដើម្បីឲ្យជនបរទេសអាចយល់ពីបេតិកភណ្ឌដ៏មានតម្លៃរបស់ប្រទេស។ ហើយការត្រឡប់មកប្រទេសថៃលើកនេះ ទ្រង់ចង់ស្វែងយល់បន្ថែមអំពីវប្បធម៌ និងបន្តផ្សព្វផ្សាយនៅបរទេស។

**បុត្រាទាំង៤អង្គ របស់ព្រះមហាក្សត្រ Maha Vajiralongorn**

ទោះយ៉ាងណាក៏ដោយ មានសេចក្ដីរាយការណ៍ថា បុត្រា Vacharaesorn នឹងចំណាយពេលប្រហែលមួយសប្ដាហ៍នៅប្រទេសថៃ មុននឹងត្រឡប់ទៅសហរដ្ឋអាមេរិកវិញ។ ទ្រង់មានភាពមមាញឹកតាំងពីពេលមកដល់ ហើយរីករាយជាមួយម្ហូបថៃល្បីៗទាំងនៅភោជនីយដ្ឋានតាមផ្លូវក្នុងប្រទេសកំណើតដោយប្រាប់ប្រជាជនថាឲ្យចាត់ទុកទ្រង់ជារាស្រ្តសាមញ្ញ៕