ប៉ូឡូញ ប្រកាសបញ្ជូនទ័ព ១ម៉ឺននាក់ទៀត ទៅព្រំដែន ដើម្បីបំភ័យ បេឡារុស

រដ្ឋមន្ត្រីការពារជាតិប៉ូឡូញ លោក Mariusz Blaszczak បាននិយាយកាលពីថ្ងៃព្រហស្បតិ៍ទី១០ខែសីហាថា ប្រទេសនេះនឹងដាក់ពង្រាយកងទ័ពបន្ថែមរាប់ម៉ឺននាក់ ទៅកាន់ព្រំដែនជាប់ជាមួយបេឡារុស ចំពេលមានភាពតានតឹងកាន់តែខ្លាំងនៅក្នុងតំបន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងទៅកាន់វិទ្យុជាតិ Polskie, លោក Blaszczak និយាយថា “យើងនឹងបញ្ជូនកងទ័ពទៅជិតព្រំដែនជាមួយប្រទេសបេឡារុសដើម្បី បំភ័យអ្នកឈ្លានពាន ដូច្នេះពួកគេមិនហ៊ានវាយប្រហារយើងឡើយ”។ លោករដ្ឋមន្ត្រីបន្ថែមថា សន្តិសុខក្នុងតំបន់​ នឹងត្រូវបានគាំទ្រដោយទាហាន១០០០០នាក់ ដោយក្នុងនោះមាន៤០០០នាក់ ត្រូវបានចាត់តាំងឲ្យគាំទ្រដោយផ្ទាល់ដល់ឆ្មាំព្រំដែន និង៦០០០នាក់ទៀត ទុកបម្រុងទុក។

ការ​គូសបញ្ជាក់​របស់​មន្ត្រី​រូប​នេះ ​ធ្វើ​ឡើង​ភ្លាម​ៗ​បន្ទាប់​ពី​ក្រសួង​ការពារ​ជាតិ​ប៉ូឡូញ ​បាន​អនុម័ត​សំណើ​របស់​មន្ត្រី​ព្រំដែន​ដើម្បី​បញ្ជូន​ទាហាន​បន្ថែម​១០០០​នាក់​ទៅ​តំបន់​នោះ។ ក្រោយ​មក អាជ្ញាធរ​ប៉ូឡូញ​ បាន​ប្ដូរ​ចិត្ត ដោយ​សម្រេច​បង្កើន​ចំនួន​ដល់ទៅ​២០០០​នាក់។

លោក Blaszczak ក៏បានរិះគន់រដ្ឋាភិបាលទីក្រុង Minsk ផងដែរ ដោយចោទប្រកាន់ជាថ្មីម្តងទៀតថា ឧទ្ធម្ភាគចក្របេឡារុស២គ្រឿង បានបំពានដែនអាកាសប៉ូឡូញកាលពីសប្តាហ៍មុន។

លោក Blaszczak ថែមទាំងអះអាងទៀតថា អ្វីគ្រប់យ៉ាងដែលកំពុងកើតឡើងនៅក្នុងប្រទេសបេឡារុស គឺមានការសម្របសម្រួលជាមួយសកម្មភាពរបស់រុស្ស៊ី។

ការអត្ថាធិប្បាយរបស់លោក Blaszczak ក៏កើតឡើងផងដែរ បន្ទាប់ពីរដ្ឋមន្ត្រីការពារជាតិរុស្ស៊ី លោក Sergey Shoigu បានប្រកាសកាលពីថ្ងៃពុធថា ទីក្រុងមូស្គូ នឹងពង្រឹងកងទ័ពរបស់ខ្លួននៅតាមព្រំដែនភាគខាងលិច ចំពេលមានការប្រឈមមុខដាក់គ្នាជុំវិញជម្លោះអ៊ុយក្រែន។

ក្នុងសុន្ទរកថារបស់គាត់ លោក Shoigu បានចាត់ទុកប្រទេសប៉ូឡូញ ជាឧបករណ៍ដ៏សំខាន់នៃគោលនយោបាយរបស់សហរដ្ឋអាមេរិក ប្រឆាំងរុស្ស៊ី៕

ប្រែសម្រួល៖ Vann Vann

ប្រភព៖ RT

ចុចអាន៖ ប៉ូឡូញ បញ្ជូនកងទ័ពទៅព្រំដែនយ៉ាងប្រញាប់ ក្រោយ ឧទ្ធម្ភាគចក្របេឡារុស រំលោភដែនអាកាសរបស់ខ្លួន