ភ្លើងឆេះព្រៃនៅហាវ៉ៃ៖ មនុស្ស ១,៣០០ នាក់បន្តបាត់ខ្លួន ខណៈមួយថ្ងៃ រកឃើញសាកសពពី ១០ ទៅ ២០ នាក់ 

ក្រុមអ្នកជួយសង្គ្រោះដែលកំពុងចូលរុករកតាមផ្ទះ និងរថយន្តដែលត្រូវដុតកម្ទេចនៅរដ្ឋហាវ៉ៃ អាចរកឃើញជនរងគ្រោះពី ១០ ទៅ ២០ នាក់ក្នុងមួយថ្ងៃៗ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតត្រឹមពេលនេះ ចំនួនមនុស្សស្លាប់បានកើនឡើងដល់ ៩៦ នាក់ហើយ ជាហេតុធ្វើឲ្យវាក្លាយជាភ្លើងឆេះព្រៃដ៏សាហាវបំផុត របស់សហរដ្ឋអាមេរិក ក្នុងរយៈពេលជាងមួយសតវត្សរ៍។

អភិបាលរដ្ឋហាវ៉ៃលោក Josh Green បានប្រាប់ CBS News ថា យើងអាចចំណាយពេលរហូតដល់ទៅ ១០ ថ្ងៃឯណោះ ដើម្បីដឹងពីចំនួនអ្នកស្លាប់ជាក់លាក់ ខណៈ​ចំនួនមនុស្ស​បាត់​ខ្លួន​ឥឡូវនេះ ​មាន​ប្រហែល​ ១,៣០០ ​នាក់​ ។

គិតត្រឹមថ្ងៃអាទិត្យ ទី១៣ ខែសីហា មន្ត្រីនៅទីក្រុង Lahaina បាននិយាយថា ពួកគេទើបតែរុករកបាន ៣ ភាគរយប៉ុណ្ណោះក្នុងទីក្រុង ហើយពួកគេ​បាន​និង​កំពុង​ប្រើ​សត្វ​ឆ្កែ​ហិតក្លិន ដើម្បី​ស្វែងរក​ជនរងគ្រោះ​បន្ថែម។

យោងតាមទីភ្នាក់ងារក្នុងតំបន់, សត្វឆ្កែសរុប ១០ ក្បាល ត្រូវបានដាក់ពង្រាយដោយក្រុមស្វែងរក និងជួយសង្គ្រោះរបស់ទីភ្នាក់ងារគ្រប់គ្រងគ្រាអាសន្នសហព័ន្ធ (FEMA) ។

ក្រុមមន្ត្រីបានប្រាប់អ្នកយកព័ត៌មានថា មនុស្សជាច្រើនក៏ត្រូវបានបញ្ជូនពីនាយកដ្ឋានពន្លត់អគ្គិភ័យភាគខាងត្បូងរដ្ឋកាលីហ្វ័រញ៉ាផងដែរ ។

ទោះបីជាយ៉ាងណាក៏ដោយ អ្នកគ្រប់គ្រង FEMA លោកស្រី Deanne Criswell បានបដិសេធផ្តល់ការប៉ាន់ប្រមាណ អំពីរយៈពេលដែលបេសកកម្មស្វែងរក និងសង្គ្រោះត្រូវចំណាយ ព្រោះតែស្ថានភាពគ្រោះថ្នាក់ខ្លាំងពេក៕

ប្រែសម្រួល៖ Vann Vann

ប្រភព៖ BBC

ចុចអាន៖ ភ្លើងឆេះព្រៃសាហាវបំផុតទាំង១០ ក្នុងប្រវត្តិសាស្ត្រពិភពលោក